КъэкIыхэрэм ягенетикэ ыкIи агробиотехнологием афытегъэпсыхьэгъэ аужырэ шапхъэхэм адиштэрэ программакIэм иIоф­шIэн Адыгэ къэралыгъо университетым щыригъэжьагъ. Iофтхьабзэм кIэщакIо фэхъугъ къэкIыхэрэм ягенетикэ фэгъэзэгъэ Урысые институтэу Н. И. Вавиловым ыцIэ зыхьырэр. Программэм инаучнэ пащэр профессорэу Елена Хлесткинар ары. — Адыгэ къэралыгъо университетымрэ къэ­кIыхэрэм ягенетикэ фэгъэзэгъэ Урысые институтымрэ зэпхыныгъэу яIэр гъэпытэ­гъэнымкIэ, ыпэкIэ лъыкIотэгъэнымкIэ мы программэм ишIогъэшхо къызэрэкIощтым щэч хэлъэп. Ащ къыдыхэлъытагъэу къэ­кIыхэрэм ягенетикэ нахь куоу зэгъэшIэгъэным фытегъэпсыхьэгъэ лъэныкъуакIэ тиапшъэрэ еджапIэ къыщызэIутхыгъ. Ар бакалавриатым ыкIи магистратурэм ягъэсэныгъэ программэхэм ахэтыщт. Джащ фэдэу къэкIыхэрэм яфеномикэкIэ апэрэ студенческэ еджапIэ АКъУ-м щызэхэт­щагъ. Биологическэ кластерым хэхъоныгъэ ышIыным къыдыхэлъытэгъэ стратегическэ проектэу «Биощынэгъончъэныр ыкIи биомоделированиер» зыфиIорэм ныбжьыкIэхэм яшIэныгъэхэм ахагъэхъонымкIэ, ушэтынхэр рагъэ­кIокIынхэмкIэ мэхьанэшхо иI, — къыхигъэщыгъ Адыгэ къэралыгъо университетым иректорэу Мамый Даутэ. Программэм пшъэрылъ шъхьаIэу иIэр къэкIыхэрэм ягенетикэ ыкIи непэрэ шапхъэхэм адиштэрэ агробиологическэ технологиехэм алъэныкъокIэ Iоф зышIэн зылъэ­кIыщт специалист дэгъухэр гъэхьазырыгъэнхэр ары. Тхьаркъохъо Адам.