Пэтхъу-Iутхъум зыщышъуухъум! къыхахыгъэх
Роспотребнадзорым Адыгэ РеспубликэмкIэ и ГъэIорышIапIэ къызэритыгъэмкIэ, икIыгъэ тхьамафэм пэтхъу-Iутхъур нэбгырэ 1447-мэ къяузыгъэу агъэунэфыгъ. Ар эпидемическэ гъунапкъэм процент 31,2-кIэ нахь макI.
Къалэу Мыекъуапэ пштэмэ, пэтхъу-Iутхъур нэбгырэ 687-мэ къяутэкIыгъ, эпидемическэ гъунапкъэм процент 41,7-кIэ ар нахь макI.
Эпидемиологхэм джыри гумэкIыгъошхо щымыIэу алъытэ, япсауныгъэ нахь фэсакъынхэу цIыфхэм къяджэх. Къэсымаджэхэрэм япчъагъэ хахъоу зэрэригъэжьагъэм ушъхьагъоу фэхъурэр ом изытетрэ цIыфым ыпкъышъол икъоу узым зэрэпымыуцужьырэмрэ.
Роспотребнадзорым шъугу къегъэкIыжьы Iоныгъом къыщегъэжьагъэу гриппым пэуцужьырэ вакцинэм ихэлъхьан епхыгъэ Iофтхьабзэр Адыгэ Республикэм зэрэщырагъэжьагъэр. А вакцинэм ихэлъхьан Iоныгъо-шэкIогъу мазэхэм аблэмыкIымэ нахь тэрэзэу медикхэм алъытэ. Сыда пIомэ узым анахь зыкъызиIэтырэ лъэхъаныр къэмысызэ иммунитетыр бгъэпы- тэн фае.
2021 — 2022-рэ илъэсхэр ащ ыпэрэхэм ябгъапшэмэ, Урысыем гриппыр нахьыбэу къыщекIокIыгъэу ыкIи ар COVID-19-м ишапхъэхэм благъэу къякIолIагъэу агъэунэфыгъ. Грипп лъэпкъэу A(H3N2) ыкIи ащ ехьщыр А(H1N1)pdm09 зыфиIохэрэр нахь къыхагъэщыгъэх.
Джащ фэдэу гриппым иштаммэу А/H1N1/pdm2009 зыфиIоу («свиной гриппкIэ» еджэх) 2009 — 2010-рэ илъэсхэм Адыгеим щыжъотыгъэр джыри дунаим ичIыпIабэхэм къызаращекIокIырэр зыщыдгъэгъупшэ хъущтэп. Ар анахь щынагъохэм ахалъытэ.
Медикхэр зэренэгуехэрэмкIэ, мыгъэ гриппыр пасэу Урысыем къэсынэу ары. Сыда пIомэ ар нэмыкI къэралыгъохэм джыри гъатхэм ащагъэунэфэу аублагъ. Арышъ, джы COVID-19-мрэ гриппымрэ зэхэхьанхэм ищынагъо къэуцу.
«Зы вакцинэр язгъэшIыгъэмэ икъущт» бэмэ аIо. Ар тэрэзэп. А узитIум яинфекциехэр, явирусхэр зэфэшъхьафых. Арышъ, апэуцужьырэ вакцинэхэри зэфэдэхэп. Ау вакцинитIури а зы мафэм зыхябгъэлъхьанхэ плъэкIыщт.
Адыгэ Республикэм псауныгъэр къэухъумэгъэнымкIэ и Министерствэ къызэритыгъэмкIэ, мы илъэсым гриппым пэуцужьырэ вакцинэр нэбгырэ мин 280-м ахалъхьанэу агъэнэфагъ. Адыгеим ныбжь зиIэхэми, кIэлэцIыкIухэми апае зэхэтэу вакцинэ дозэ мини 105-м ехъу къэкIуагъ. Ахэр Урысы- ем къыщашIыгъэ препаратхэу «Совигрипп» (дозэ 58730-рэ) ыкIи «Ультрикс Квадри» (дозэ 46280-рэ) зыфиIохэрэр ары.