Тыгъуасэ Запорожскэ, Херсонскэ хэкухэм, Донецкэ ыкIи Луганскэ народнэ рес­пуб­ликэхэм референдум ащырагъэжьагъ Урысые Федерацием къыхэхьанхэм фэгъэхьыгъэу.

Мы чIыпIэхэм ащыпсэухэрэм яшIоигъоныгъэ дырагъаштэу Мыекъуапэ игупчэу Зэкъошныгъэм цIыфхэр къыщызэрэугъоигъагъэх. Митинг-концертэу «Тэ тиехэр чIэтыдзхэрэп» зыфиIорэм къе­кIолIагъэх республикэм иIофшIэкIо купхэр, политическэ партиехэм, общественнэ организациехэм ялIыкIохэр, шIэныгъэм, гъэсэныгъэм яцIыф пэрытхэр, динлэжьхэр, еджакIохэр, ныбжьыкIэхэр.

Адыгэ Республикэм иветеранхэм я Совет итхьаматэу Къоджэ Аслъан зэхахьэм къыщыгущыIагъ. Донецкэ ыкIи Луганскэ республикэхэр мамырэу псэунхэу, ялъэпкъ Iофыгъохэр агъэцэкIэнхэ алъэкIэу щыIэнхэ фаеу ащ къыIуагъ.

Отставкэм щыIэ генералэу Александр Дорофеевым ятэжъи, иIахьылхэри Украинэм щыкIогъэ зэо зэфэшъхьафхэм ахэ­лэжьагъэх. Пыйхэм язэхэкъутэн лIы­гъэ щызэрахьагъ. Донецкэ ыкIи Луганскэ республикэхэм ямамыр щыIакIэ къэухъумэгъэным имэхьанэ, референдумэу зэхащагъэм кIэухышIу зэрэфэхъу­щтым ицыхьэ зэрэтелъыр А. Дорофеевым хигъэунэфыкIыгъэх. Культурэм иIофышIэхэм мамырны­гъэм, зэкъошныгъэм, патриотическэ пIуныгъэм афэгъэхьыгъэ орэдхэр зэхахьэм къыщаIуагъэх. Юнармейцэхэм, ныбжьыкIэхэм Урысыем, Адыгеим ябыракъхэр Iофтхьабзэм щагъэбыбэтагъэх.

Референдумым имэхьанэ къыкIи­гъэтхъызэ Адыгеим и ЛIышъхьэ мыщ фэдэу исоциальнэ нэкIубгъохэм къащитхыгъ:

«Мы хъугъэ-шIагъэм цIыф миллионхэу мамырныгъэ щыIакIэм хэтхэу псэухэ, Iоф зышIэ, зисабый зыпIу, неущырэ мафэм зицыхьэ телъынэу фаехэу тикъэ­ралыгъошхо щыщ хъу зышIоигъохэм ящыIэныгъэ нахьышIум ылъэныкъокIэ зэблихъущт. Президентэу Владимир Путиным къызэрэкIигъэтхъыгъэмкIэ, тэ «зинасып ежь-ежьырэу зыгъэпсы зышIоигъомэ къызэ­рэтщыгугъыхэрэмкIэ тадэмы­IэпыIэн тлъэкIыщтэп. Тиехэр чIэтыдзыхэрэп!»

ЕмтIылъ Нурбый.