Гриппым пэшIуекIорэ вакцинэм ихэлъхьан епхыгъэ кампаниер Адыгеим щылъагъэкIуатэ. ЗэрагъэнэфагъэмкIэ, ащ нэбгырэ мин 280-рэ къыхиубытэщт.

Тыгъуасэ шъолъырым ихэбзэ къулыкъухэм ялIыкIохэм прививкэ зарагъэ­шIыгъ. Ахэм ахэтыгъэх АР-м и Къэралыгъо Совет — Хасэм и Тхьаматэу Владимир Нарожнэр, Адыгеим псауныгъэр къэу­хъумэгъэнымкIэ иминист­рэу Мэрэтыкъо Рустем.

— ЧъыIэ къызыхъурэ лъэхъаным узхэм зыкъа­Iэты, арышъ, джырэ уахътэм гриппым пэшIуекIорэ пэшIорыгъэшъ иммунизациер зэхэтщэным мэ­хьанэшхо иI. Апэдэдэ нахьыжъхэм, етIанэ уз гъэ­тIылъыгъэ зиIэхэм прививкэ зарагъэшIын фае. Уз зэфэшъхьафхэм (ахэм ахэхьэ коронави­русри) защыухъумэгъэнымкIэ мы шIыкIэр ары анахь щынэгъончъэу ыкIи шIуагъэ къэзытэу щытыр. Ковидыр къызеузыгъэм ыуж илъэсныкъо тешIа­гъэмэ, цIыфым прививкэ заригъэшIын фае, — къы­Iуагъ Мэрэтыкъо Рустем.

В. Нарожнэм гриппым пэшIуекIорэ вакцинэ за­къор ары аригъэшIыгъэр, сыда пIомэ вакцинэу «КовиВак» зыфиIорэр зы­зыхаригъэлъхьагъэр джыри илъэсныкъо хъугъэп.

АР-м псауныгъэр къэу­хъумэгъэнымкIэ и Министерствэ къызэритыгъэмкIэ, гриппым пэшIуекIо­рэ вакцинэ Iахь мини 105-м ехъу шъолъырым къыIэкIэхьагъ. Iоныгъом и 14-м ехъулIэу нэбгырэ мин 23,5-мэ прививкэ зарагъэшIыгъ, ахэм ащыщэу мини 5,6-р кIэлэцIыкIух.