Мыекъуапэ зэпахырэ узэу коронавирусым зызэрэщиушъомбгъурэм иIофыгъохэм япхыгъэу ащ фэгъэзэгъэ ведомствэхэм ялIыкIохэм къэлэ администрацием ипащэу Геннадий Митрофановым зэIукIэгъу адыриIагъ.

Адыгеим икъэлэ шъхьаIэ ковидыр къызэузыхэрэм япчъа­гъэ зыкъыщиIэтэу ыублагъ, ахэм кIэлэцIыкIухэри ахэтых.

Мыекъопэ къэлэ поликлиникэм ипащэу ЕмтIылъ Оксанэ къызэриIуагъэмкIэ, эпидбригадэ 18-мэ сымаджэхэр къакIухьэх. ГухэкI нахь мышIэми, омикроным имызакъоу, нэмыкI штаммхэри къалэм къыщекIокIых. Iофым изытет къыгъэхьылъэн ылъэкIыщт бжыхьэ лъэхъаным къежьэрэ пэтхъу-Iутхъур ыкIи гриппыр къызыхахьэхэкIэ.

— Зэпахырэ узхэм тащызыухъумэщтыр вакцинациер ыкIи ревакцинациер ары. Мыекъуапэ тштэмэ, вакцинэм иапэрэ Iахьыр зыхалъхьагъэхэм япчъагъэ процент 80-м шIокIыгъ, ау ревакцинациемкIэ гумэкIыгъо щыI. Ащ ыпкъ къикIыкIэ «коллективнэ иммунитетым» ишапхъэ къыкIичын ылъэкIыщт. Мыщ фэгъэзэгъэ подразделениехэм япащэхэм Iофыгъор дагъэзыжьынэу унашъо афэсшIыгъ, — зэхэсыгъом щыхигъэунэфыкIыгъ Мыекъуапэ имэр.

Республикэм икъэлэ шъхьаIэ вакцинэр зыщахалъхьэрэ чIыпIи 3-мэ мафэ къэс Iоф ашIэ. Ахэр зыдэщыIэхэр: къэлэ поликлиникэхэр зытет урамэу Чкаловым ыцIэ зыхьырэр, 77, Жуковскэм ыцIэ зыхьырэр, 18, урамэу Комсомольскэр, 159. Ащ нэмыкIэу, терапиемкIэ отделение пэпчъ ипроцедурнэ кабинетхэм коронавирусым пэуцужьырэ вакцинэр яI, фаехэм ащ щызыхалъхьан алъэ­кIыщт.

— Узым зызэриушъомбгъурэр къызэтедгъэуцон тлъэ­кIыщт. Ащ пае игъом цIыфхэм прививкэр зыхара­гъэлъхьан фае. Хэти щыгъуп­шэ мыхъущтыр ежь ипсауныгъи адрэ къэзыуцухьэхэрэм япсауныгъи ащкIэ ухъумагъэ зэрэхъущтыр ары, — къы­Iуагъ Геннадий Митрофановым.

Медикхэм къызэраIорэмкIэ, бжыхьэ лъэхъаным иммунитетыр нахь зыгъэпытэщтыр гриппым ыкIи коронавирусым апэ­уцужьырэ вакцинэхэр зыхябгъалъхьэхэмэ ары.

Iэшъынэ Сусан.