Мыекъуапэ хэхьэхэрэ поселкэу Родниковэм игурыт еджапIэу N 25-м ыкIи станицэу Ханскэм игурыт еджапIэу N 23-м гъэсэныгъэмкIэ гупчэу «Точка роста» зыфиIорэм фэдэхэр Iоныгъом и 15-м къащызэIуахыгъ. Федеральнэ проектэу «Джырэ шапхъэхэм адиштэрэ гурыт еджапI» зыфиIорэм, лъэпкъ проектэу «Гъэсэныгъэм», шъолъыр хэбзэ органхэм яшIуагъэкIэ ахэр агъэпсынхэ алъэкIыгъ.

Гупчэхэм якъызэIухын фэгъэ­хьыгъэ Iофтхьабзэр мэфэкI шIы­кIэм тетэу кIуагъэ. Ащ хэлэжьагъэх Мыекъопэ къэлэ администрацием ипащэу Геннадий Митрофановыр, ащ иапэрэ гуа­дзэ ипшъэрылъхэр зыгъэцэкIэрэ Сергей Стельмах, гъэсэныгъэмкIэ къэлэ Комитетым ыкIи учреждениехэм ялIыкIохэр.

Мыекъуапэ имэр агъэкIэжьыгъэ классхэр къыплъыхьагъэх, оборудованиеу ачIагъэуцуагъэ­хэр зэригъэлъэгъугъэх, кIэлэ­егъаджэхэм ыкIи кIэлэеджакIо­хэм гущыIэгъу афэхъугъ.

— УФ-м и Правительствэ, АР-м и ЛIышъхьэу КъумпIыл Мурат, лъэпкъ проектэу «Гъэ­сэныгъ» зыфиIорэм яшIуагъэ­кIэ къэлэ еджапIэхэмрэ къоджэ еджапIэхэмрэ азыфагу илъыгъэ зэфэмыдэныгъэр джы дэ­гъэзыжьыгъэ мэхъу. НыбжьыкIэ пэпчъ аужырэ шапхъэ­хэм ади­штэрэ технологиехэр ыгъэфедэхэзэ ишIэныгъэхэм ахигъэ­хъон амал иIэн фае. Естественнэ ыкIи хьисап шIэныгъэхэр дэгъоу кIэлэеджа­кIохэм зэрагъэшIэнымкIэ ама­лышIухэр егъэджэн шIыкIакIэхэм къатыщт. Федеральнэ программэхэм яшIуагъэкIэ Iэмэ-псымакIэхэр зэдгъэгъотыгъэх. IофшIэныр лъыдгъэ­кIотэщт, шIэхэу Мыекъуапэ илицееу N 35-м кванториум къыщызэIутхыщт, — хигъэ­унэ­фыкIыгъ Геннадий Митрофановым.

Къалэм ипащэ гупчэхэм якъы­зэIухынкIэ кIэлэегъаджэхэм ыкIи кIэлэеджакIохэм афэгу­шIуагъ, гъэхъагъэхэр еджэным щашIынхэмкIэ, шIэныгъэ куухэр зэрагъэгъотынхэмкIэ мыщ ишIуа­гъэ къызэрэкIощтым ицыхьэ зэрэтелъыр къыхигъэщыгъ.

Естественнэ ыкIи техническэ лъэныкъохэмкIэ, купым хэтхэу Iоф ашIэнымкIэ ыкIи нэмыкIхэмкIэ шIэныгъэхэр ахэм ащарагъэ­гъотыщт.

Зэтырагъэпсыхьэгъэ классхэм химиемкIэ, хьисапымкIэ, биологиемкIэ ыкIи нэмыкI предметхэмкIэ яшIэныгъэхэм ащахагъэхъощт. Мыщ Iоф щызы­шIэрэ кIэлэегъаджэхэм хэу­шъхьафыкIыгъэ егъэджэнхэр акIугъэх.

Iэшъынэ Сусан.