Хьисапыр зикIасэхэм апай
Мы мафэхэм хьисапыр зикIэсэ ныбжьыкIэхэм апае Урысые кIэлэцIыкIу гупчэу «Орленкэм» Iофтхьабзэ щызэхащагъ. ХьисапымкIэ Урысые олимпиадэм текIоныгъэ ыкIи хагъэунэфыкIырэ чIыпIэ къыщыдэзыхыгъэ кIэлэеджэкIуи 100 фэдиз мыщ щызэрэугъоигъ. Шъолъыр 34-мэ ахэр къарыкIыгъэх, Адыгеим щыщ нэбгыри 7 ахэт.
Мэфэ 21-м къыкIоцI кIэлэцIыкIухэм яшIэныгъэхэм ахагъэхъон амал яIэщт, джэгукIэ зэфэшъхьафхэр, зэнэкъокъухэр, хьисапымкIэ, гуманитар ыкIи естественнэ шIэныгъэхэмкIэ лекциехэр, джащ фэдэу спортивнэ ыкIи зыгъэчэфыщтхэ Iофтхьабзэхэр афызэхащэщтых. Хабзэ зэрэхъугъэу, Къыблэ хьисап зэнэкъокъури рагъэкIокIыщт.
«Юный математик» зыфиIорэр 2005-рэ илъэсым къыщегъэжьагъэу «Орленкэм» щызэхащэ. А уахътэм къыкIоцI шъолъыр 50-мэ къарыкIыгъэ ныбжьыкIэ минитIу фэдиз ащ хэлэжьагъ.
Адыгэ къэралыгъо университетым хьисапымкIэ и Гупчэ, республикэ естественнэ-хьисап еджапIэр ыкIи «Орленкэр» Iофтхьабзэм кIэщакIо фэхъугъэх .