ГъогурыкIоным ишапхъэхэр арагъэшIагъ
Хабзэ зэрэхъугъэу, апэрэ классым ихьэгъэ кIэлэцIыкIухэм гъогурыкIоным ишапхъэхэр Къэралыгъо автоинспекцием икъулыкъушIэхэм къафаIотагъэх.
Мыекъуапэ дэт «Автогородокым» мы мафэхэм мэфэкI Iофтхьабзэ ахэм щызэхащагъ. АР-м и Къэралыгъо автоинспекцие ипащэ игуадзэу Едыдж Мурат ащ хэлэжьагъ. Iофтхьабзэм къекIолIэгъэ кIэлэцIыкIухэм гъогурыкIоным ишапхъэхэр зэрагъэшIэнэу ыкIи ахэр амыукъонхэу ащ зафигъэзагъ. Къэнэфырэ ныбалъэхэр ащыгъынхэу ыкIи «Дом-Школа-Дом» зыфиIорэ щынэгъончъэ маршрутыр ны-тыхэр ягъусэу зэхагъэуцонэу къариIуагъ.
Iофтхьабзэр джэгукIэ шIыкIэм тетэу кIуагъэ, кIэлэцIыкIухэмкIэ шIуагъэ пылъэу ар зэхащагъ. ГъогурыкIоным ишапхъэхэр аниматорхэм къафаIотагъ. ШIэныгъэу агъотыгъэхэмкIэ заушэтыжьыгъ, викторинэм иупчIэхэм яджэуапхэр къаратыжьыгъэх.
Iофтхьабзэм икIэухым апэрэ классым ихьэгъэ кIэлэцIыкIухэм Къэралыгъо автоинспекцием ыгъэхьазырыгъэ шIухьафтынхэр ыкIи зэрэлъэсрыкIо ныбжьыкIэхэр къэзыушыхьатырэ удостоверениехэр аратыгъэх.