Адыгеим и ЛIышъхьэу КъумпIыл Муратрэ Краснодар краим иадминистрацие и Пащэу (игубернаторэу) Вениамин Кондратьевымрэ зэдыряIэгъэ зэIукIэр тыгъуасэ Мыекъуапэ щыкIуагъ.

Ар зыфэгъэхьыгъагъэр Адыге­имрэ Пшызэ шъолъырымрэ экономикэм, культурэм, псауныгъэм икъэухъумэн, гъэсэныгъэм, социальнэ ыкIи нэмыкI лъэныкъохэм япхыгъэ зэдэлэ­жьэныгъэу азыфагу илъыр ары.

Мы Iофтхьабзэм хэлэжьагъэх Адыгэ Республикэм и Къэралыгъо Совет — Хасэм и Тхьаматэу Владимир Нарожнэр, Адыгеим и Премьер-министрэ ипшъэрылъхэр зыгъэцакIэу КIэрэщэ Анзаур, Адыгэ Респуб­ликэм и ЛIышъхьэрэ Адыгэ Республикэм иминистрэхэм я Кабинетрэ я Администрацие ипащэу Владимир Свеженец, АР-м иминистрэхэм я Кабинет хэтхэр. Пшызэ шъолъыр илIыкIохэм ацIэкIэ Краснодар краим и Хэбзэгъэуцу ЗэIукIэ итхьаматэу Юрий Бурлачко, Краснодар краим иадминистрацие ипащэ иапэрэ гуадзэу Игорь Галась, Краснодар краим игубернатор игуадзэу Андрей Коробка, Краснодар краим игубернатор игуадзэу Анна Миньковар, Краснодар краим игубернатор игуадзэу Александр Власовыр, Краснодар краим иадминистрацие хэгъэгу кIоцI политикэмкIэ идепартамент ипащэу Александр Топаловыр зэIукIэм хэлэжьагъэх.

Iофтхьабзэр къызэIуихызэ Адыгеим и ЛIышъхьэу КъумпIыл Мурат къызэрэхигъэщыгъэмкIэ, Пшызэ шъолъырымрэ Адыгеимрэ яблэгъэныгъэ зэфыщытыкIэхэм алъапсэ чыжьэу къыще­жьэ, блэкIыгъэми зэфэдэу тызэрепхы.

«Сатыу-экономикэ ыкIи гуманитар лъэныкъохэмкIэ Пшызэ шъолъырыр анахь мэхьа­нэшхо зэттырэ тигъусэгъухэм ащыщ. Промышленностым, транс­портым, логистикэм, зекIоным алъэныкъокIэ тизэдэлэжьэныгъэ зетэгъэушъомбгъу. Джащ фэдэу медицинэм ылъэныкъокIи Iоф зэдэтэшIэ. Гъсэныгъэ зыщарагъэгъотырэ ыкIи научнэ учреждениехэм кадрэхэм якъэ­гъэхьазырын иIофыгъохэмкIэ зэдэлэжьэныгъэ азыфагу илъ, зэгъусэхэу научнэ-ушэтын проектхэр зэдагъэцакIэх. Культурэм ылъэныкъокIэ гъэхъагъэу тиIэхэмкIи тызэхъожьы, спортым ихэхъоныгъэкIи джащ фэдэу ты­наIэ зэтет. НепэкIэ спортым е творческэ мэхьанэ зиIэ Iоф­тхьабзэхэу цIыфхэр жъугъэу зыхэлажьэхэрэм тигъунэгъухэри къахэмылажьэхэу хъурэп. НыбжьыкIэхэм япхыгъэ IофшIэнымкIи тызэдэлажьэ. Лъэпкъ зэфэшъхьафхэм азыфагу зэгурыIоныгъэ илъыным иIофы­гъохэр тызэгъусэу зэшIотэхы», — къыIуагъ республикэм и ЛIышъхьэ.

КъызэрэхагъэщыгъэмкIэ, сыд фэдэрэ лъэныкъокIи ащ фэдэ зэдэлэжьэныгъэм шIуагъэ къе­хьы ыкIи ар лъыгъэкIотэгъэн фае. КъумпIыл Мурат къызэриIуагъэмкIэ, краимрэ респуб­ликэмрэ гъусэныгъэу азыфагу илъым джыри нахь зегъэушъом­бгъугъэн, хэгъэгум и Къыблэ экономикэм ылъэныкъокIэ шъо­лъыр зыкIэу хъуным ткIуачIэ зэхэлъэу тыдэлэжьэн фае. «ЦIыфхэми яфедэ ащ хэлъ, къэралыгъо федэхэми икъоу ар адештэ. Лъэпкъ пстэуми зэдыряеу щыт Iофыгъохэу къэуцу­хэ­рэм язэшIохынкIэ шIуагъэ къэзытырэ амалэу щыт шъо­лъырхэм язэдэлэжьэныгъэ», — къыIуагъ АР-м и ЛIышъхьэ.

Краснодар краим игубернаторэу Вениамин Кондратьевыр къызэгущыIэм Адыгеим и ЛIы­шъхьэу КъумпIыл Мурат зэрэхадзыжьыгъэм пае къыфэгу­шIуагъ, илъэси 5-у блэкIыгъэм республикэм гъэхъэгъэшIухэр зэришIыгъэхэр ащ къыхигъэ­щыгъ.

«Адыгеим пэщэныгъэ зыщыдызепхьэрэ лъэхъаным къы­кIоцI гъэхъэгъэшIухэр ышIыгъэх. Ко­ронавирусым къыздихьыгъэ гу­мэкIыгъохэм шъуафырикъун шъулъэкIыгъ ыкIи непэрэ экономикэ Iофхэм язытет нахьышIу шIыгъэным епхыгъэ пшъэрылъхэр зэшIошъохых. О опытышхо зиIэ пащэу ущыт, уичIыпIэгъу­хэм яфедэ икъэухъумэн ренэу унаIэ тет. Республикэм,

Краснодар краим фэдэу, сыд фэдэ лъэхъэнэ анахь къинхэу къе­кIугъэми культурэ кIэн ыкIи шэн-хэбзэ дахэу шъухэлъхэм шъуадэхыгъэп. А лъэныкъохэр ары Пшызэ шъолъырымрэ Адыгеимрэ зэзыпхыхэрэр», — къыIуагъ Вениамин Кондратьевым.

Губернаторым джащ фэдэу къыхигъэщыгъ Краснодар краим­рэ Адыгэ Республикэмрэ эконо­микэм, социальнэ ыкIи культурэ лъэныкъохэмкIэ зы шъолъырэу зэрэщытхэр, зы шъолъырым игъэхъагъэхэм гъу­нэгъу шъо­лъырым хэхъоныгъэ ышIынымкIэ яшIуагъэ къызэ­рэ­кIорэр.

«Непэ Пшызэ шъолъырымрэ Адыгеимрэ, зым зыр икIэгъэ­къонэу, хэхъоныгъэ ашIы, ыпэкIэ лъэкIуатэх. Анахь мэхьэнэ ин зиIэ лъэныкъо пстэухэмкIи тизэпхыныгъэхэр тэгъэпытэх. Бизнесэу IофшIэпIакIэхэр, цIыф­хэм ящыIакIэ нахьышIу шIыгъэ­нымкIэ амал гъэнэфагъэхэр къэзытырэм джыри нахь зиу­шъомбгъунымкIэ ищыкIагъэхэр фызэхэтэщэх. ТкIуачIэ зэхэлъмэ проект ыкIи гухэлъ шIагъохэр зэрэпхырытщыщтхэм, сыд фэдэ къин къыкъокIыгъэми щыдгъэзыен зэрэтлъэкIыщтым сицыхьэ телъ», — къыIуагъ Вениамин Кондратьевым.

ЛъэныкъуитIуми япроектхэм афэгъэхьыгъэу зэIукIэм къы­щыгущыIагъэх шъолъыритIуми япарламентхэм япащэхэр, Краснодар краим ивице-губернаторхэр, Адыгеим и Премьер-министрэ ипшъэрылъхэр зыгъэцакIэрэр, республикэм иведомствэ зэфэшъхьафхэм япащэхэр.

Мы зэIукIэгъум икIэухэу плъы­тэн плъэкIыщт Адыгеимрэ Пшызэ шъолъырымрэ анахь мэхьанэ зиIэ пшъэрылъхэу апашъхьэ итхэм язэшIохынкIэ зэдэлэжьэныгъэу тапэкIи азыфагу илъыщтым фэгъэхьыгъэ унашъор, ащ къыхеубытэх экономикэм, инфраструктурэм, мэкъу-мэщым, псауныгъэм икъэу­хъумэн, гъэсэныгъэм, куль­турэм япхыгъэу бгъуитIуми зэшIуахыщтхэр.

Адыгэ Республикэм и ЛIышъхьэ ипресс-къулыкъу

Сурэтхэр А. Гусевым тыри­хыгъэх.