КIэлэцIыкIухэу зипсауныгъэкIэ щыкIагъэ зиIэхэм зыпкъ итэу хэхъоны­гъэ ашIыным иамал ягъэгъотыгъэным тегъэпсыхьэгъэ Iофтхьабзэхэр ренэу адызэрахьанхэ фае. Ау ащ ахъщи, шIэныгъи ищыкIагъ.

Сэкъатныгъэ зиIэ е зипсауны­гъэ пыч фэхъугъэ кIэлэцIы­кIу­хэр яунэ исхэу, лъэныкъо пстэухэм­кIи хэхъоныгъэ ашIыным иамал арегъэгъоты Адыгэ Республикэм икъэралыгъо бюджет учреждениеу «Социальнэ-­реабилитационнэ гупчэу «До­верие» зыцIэм. 2021-рэ илъэсым къыщыублагъэу а учреж­дением щызэхащагъ хэушъхьафыкIыгъэ къулыкъоу «Унэгъо микрореабилитационнэ гупч» зыфиIорэр. Сэ­къатныгъэ зиIэ кIэлэцIыкIухэм япсауныгъэ ­зы­пкъ игъэуцожьыгъэнымкIэ зи­шIуагъэ къэкIощт пкъыгъо зэ­фэшъхьафхэр ащ къащаратых пIэлъэ гъэнэфагъэ иIэу къызфагъэфедэнхэу.

ЧIыпIэ зэжъу ифэгъэ кIэлэцIыкIухэм IэпыIэгъу ятыгъэным фэгъэзэгъэ Фондым зэхищэгъэ зэнэкъокъум мы учреждением зэхигъэуцогъэ социальнэ проектэу «Домашка» зыцIэм текIоныгъэр къызыщыдехым, грантэу сомэ миллиони 5 къызэрэфагъэшъошагъэм ишIуагъэкIэ а оборудованиер къызIэкIагъэ­хьан алъэкIыгъ.

Проектыр зыщыIэ ыкIи зыщагъэцэкIэрэ пIалъэм къыкIоцI (2021-рэ илъэсым мэлылъфэ­гъум и 1-м къыщыублагъэу 2022-рэ илъэсым Iоныгъом и 30-м нэс) республикэм щыщ унэгъо 80-мэ (кIэлэцIыкIу сэ­къатхэр зэрысхэм) ыпкIэ хэмылъэу оборудование зэфэ­шъхьафхэр къаратыгъэх: вертикализаторхэр, тренажерхэр, нэмыкIхэр. Яунэ исхэу якIэлэцIыкIухэм япсауныгъэ зыпкъ рагъэуцожьыным пае ны-тыхэм къашъхьапэщт программэхэр афызэхагъэуцуагъэх, а Iэмэ­-псымэхэу пIэлъэ гъэнэфагъэкIэ къаратыгъэхэр зэрагъэфедэщтхэр къафаIотагъ.

Проектым ипIалъэ зикIыкIи а IофшIэныр лъагъэкIотэщт. ФэIо-фашIэхэм япхыгъэу упчIэ зиIэхэм цIыфхэм ясоци­альнэ фэIо-фашIэхэм ягъэцэкIэн фэгъэзэгъэ Гупчэм е ­Адыгэ Рес­публикэм икъэра­лыгъо бюд­жет учреждениеу «Гупчэу «Доверием» зафагъэзэн алъэкIыщт.