Адыгэ къэралыгъо технологическэ универ­си­тетым мыгъэ чIэхьэгъэ ныбжьыкIэхэр Iоныгъом и 14-м аугъоигъэх.

«Сэ МГТУ-м сыристудент» зыфиIорэ Iофтхьэбзэ гъэшIэ­гъон ахэм афызэхащагъ. Мы апшъэрэ еджапIэм мыгъэ нэбгырэ 700-м ехъу къычIэхьагъ.

Iофтхьабзэм ипэублэ ныбжьыкIэхэм шIуфэс къарихыгъ апшъэрэ еджапIэм егъэджэн IофшIэнымкIэ ипроректорэу Людмила Задорожнаям. Технологическэ университетым илъэс зэкIэлъыкIохэм шэн-хэбзэ гъэ­нафагъэу иIэ хъугъэхэм, амалышIоу IэкIэлъхэм, нэмыкIхэми ар къатегущыIагъ. ШIэныгъэ куухэр зыIэкIэлъхэу апшъэрэ еджапIэм къычIитIупщыщтхэм ащыщ хъунхэу зэращыгугъырэр къыхигъэщыгъ.

Нэужым апэрэ курсым ихьагъэхэм ямэфэкI мафэкIэ къафэ­гушIуагъ АР-м гъэсэныгъэмрэ шIэныгъэмрэкIэ иминистрэ иIэ­натIэ зыгъэцэкIэрэ Евгений Ле­бедевыр. Студент илъэс еджэ­гъухэр гум къызэринэ­жьы­хэрэр къыхигъэщыгъ, а уахътэр шIуагъэ къытэу къызфагъэфе­дэнэу за­къыфигъэзагъ. Еджэным гъэ­хъагъэ щашIынэу къафэ­лъэIуагъ, обществэм ыкIи къэралыгъом шIэныгъэ куухэр зыIэкIэлъ ныбжьыкIэхэр зэрящыкIагъэм министрэм къыкIигъэтхъыгъ.

Хабзэ зэрэхъугъэу, апшъэрэ еджапIэм иIофшIэн зэрэзэхищэрэр, интерактивнэ площадкэу яIэхэр бэмышIэу студент хъугъэхэм къафаIотагъэх, арагъэлъэгъугъэх.

Мы мафэм интерактивнэ площадкэ 23-рэ фэдизмэ Iоф ашIагъ. Студент хъугъакIэхэм ахэр къакIухьагъэх ыкIи апшъэ­рэ еджапIэм ищыIакIэ хэщагъэ хъугъэх, шъхьадж зыфэщэгъэ лъэныкъом нахь игъэкIотыгъэу кIэупчIагъ.

Инновационнэ технологиехэм япхыгъэ площадкэм екIо­лIагъэхэм продукцие зэмы­лIэу­жыгъохэр къызэрэдагъэкIыхэрэр, «WorldSkills МГТУ — путь к успеху» зыфиIорэм лъэныкъо зэфэшъхьафхэмкIэ студентхэм ясэнэхьатхэмкIэ IэпэIэсэныгъэу аIэкIэлъ хъугъэр щыIэныгъэм зэрэщыпхыращыщтыр къащафаIотагъэх. Апшъэ­рэ еджапIэм щызэхащэгъэ отрядхэм ныбжьыкIэхэр нэIуасэ афашIыгъэх.

Илъэс зэкIэлъыкIохэм хэгъэ­гум ит апшъэрэ еджэпIэ пчъагъэмэ Мыекъопэ къэралыгъо технологическэ университетым зэзэгъыныгъэ адишIыгъэу Iоф ешIэ. Шъхьадж зэригъэгъотырэ сэнэхьатым елъытыгъэу IэкIыб къэралыгъохэм практикэ зэрэщахьын алъэкIыщтыр ныбжьыкIэхэм къафаIотагъ.

ЕджапIэм студенческэ объ­еди­нение 13 иI, ныбжьыкIэхэм ясэнаущыгъэ, лъэныкъо зэфэшъхьафхэмкIэ яшIэныгъэхэм ахагъахъо. ГущыIэм пае, Мые­къопэ организациеу «Российский Союз Молодежи», Адыгэ шъолъыр отделениеу «Урысые студенческэ отрядхэр», «Студенческэ медиа-купыр», нэ­мыкIхэри.

Апэрэ курсым чIэхьэгъэ ныб­жьыкIэхэм площадкэхэр къа­кIухьагъэх ыкIи шъхьадж шIо­гъэшIэгъон лъэныкъом зыфи­гъэзэнэу унашъо ашIыгъ.