IофшIэнхэр лъагъэкIуатэх
Адыгэкъалэ дэт саугъэт зэхэтым къыпэIулъ паркым изэтегъэпсыхьан лъагъэкIуатэ.
Муниципалитетым ипащэу ЛIыхэсэ Махьмуд къызэриIуагъэмкIэ, Iэрыфэгъу къэлэ щыIакIэр гъэпсыгъэным къыдыхэлъытагъэу проект анахь дэгъухэм якъыхэхын фытегъэпсыхьэгъэ Урысые зэнэкъокъум Адыгэкъалэ текIоныгъэр къыщыдихыгъ ыкIи ащ ишIуагъэкIэ мы чIыпIэр зэтырагъэпсыхьан амал яIэ хъугъэ.
Шъугу къэдгъэкIыжьын, блэкIыгъэ илъэсым къалэу Нижний Новгород щызэхащэгъэ форумэу «Среда для жизни» зыфиIорэм зэтырагъэпсыхьащт чIыпIэхэм якъыхэхынкIэ къагъэлъэгъогъэ проектхэм осэшIхэр ахэплъагъэх ыкIи анахь дэгъуи 160-рэ къахахыгъ. Къэлэ цIыкIухэм ыкIи тарихъ мэхьанэ зиIэ псэупIэхэм проектхэр ащагъэцэкIэщтых, IофшIэнхэр 2022 — 2023-рэ илъэсхэм ателъытагъэх. Нэбгырэ мин 20-м кIахьэу зыдэс псэупIэхэм язэнэкъокъу Адыгэкъалэ текIоныгъэр къыщыдихыгъ ыкIи ащ ишIуагъэкIэ ар джыри нахь зэтырагъэпсыхьан, хэхъоныгъэхэр ышIынхэ амал щыIэ хъугъэ.
Мыщ нэмыкIэу лъэпкъ проектхэм, программэ зэфэшъхьафхэм къатырэ амалхэр Адыгэкъалэ дэгъоу щагъэфедэх, муниципалитетым ипащэхэм а IофшIэныр тапэкIи лъагъэкIотэн гухэлъ яI. АшIэрэр зэкIэ зыфэгъэхьыгъэр зы — цIыфхэм ящыIэкIэ-псэукIэ нахьышIу шIыгъэныр ары.