Диетологхэм, нутрициологхэм, врач зэфэ­шъхьафхэм аужырэ илъэсхэм нахьыбэрэ къаIоу рагъэжьагъ Iоф­шIэгъу ужым, унэм узыкIожькIэ, макIэу шъон пытэ горэм уешъомэ, пкъышъолым ишIуагъэ къекIэу.

Ау шапхъэу къаIохэрэр зэтекIых. Зыхэм грамм 50-м ублэмыкIымэ дэгъоу, адрэхэм цIыфым къыщэчырэ килограмм пчъагъэм фэдиз грамм уешъомэ нахь тэрэзэу алъытэ.

Уемышъуахэмэ нахьыбэ бгъэшIэнэу зыIорэри макIэп. Ешъоным къикIырэп уегъэутэшъофэкIэ уешъонэу. Ау ныбжьыкIэхэу зипсауныгъэ пытэхэмрэ уз гъэтIылъыгъэ зиIэ хъугъэхэмрэ шъоным зэрэфыщытхэр зэфэдэп.

Диетологэу, медицинэ шIэныгъэхэмкIэ докторэу, профессорэу Михаил Гинзбург цIыфым ипсауныгъэ шъоным зэрар регъэкIымэ зэрагъэшIэнэу цIыфыбэмэ зыфагъазэщтыгъ. Джащ фэдэу телевидением икъэтынхэм, зэIукIэгъу-зэдэгущыIэгъухэм арагъэблэгъэрэ специалистым зыныбжь хэкIотэгъэ цIыфхэр узыгъэутэшъорэ шъонхэм ямышъуахэхэмэ нахь тэрэзэу сыдигъуи ылъы­тагъ. КIэлэгъур зикIыкIэ, узфэсакъыжьмэ, шъоныр зыщыбгъэгъупшэмэ нахьышIу.

Шъоным гу-лъынтфэ системэр зэIегъахьэ, гум нахь псынкIэу Iоф регъашIэ, ар нахь шIэхэу къытеоу регъа­жьэ, жьыр нахьыбэу ищыкIагъэу мэхъу. Ащ атеросклерозыр къызыхэхьажькIэ, цIыфым инфаркт къеон ылъэ­кIыщт.

Шъон пытэхэм ачIыпIэкIэ ренэу щай (щай уцышъом) уешъомэ нахьышIу, псауныгъэр ащ къызэтырегъанэ. Джащ фэд мэркIо-цумпэ лъэпкъ зэфэшъхьафхэм къа­кIафыгъэ псыр (морсыр), ащ витаминхэр бэу хэлъых, шъоущыгъу хэмылъэу уешъонэу щыт.

Пхъэшъхьэ-мышъхьэхэм, анахьэу хэтэрыкIхэм, ахэлъ шъоущыгъур нахь макIэми, клетчаткэр нахьыб. Профессорэу М. Гинзбург къыIо зэпытыгъ шъоным фэдэу лымрэ шэмрэ гумкIэ зэрэшхыныгъо хьылъэхэр.

(Тикорр.).