Советскэ лъэхъаным унагъо пэпчъ йодыр ренэу иIагъ, ыгъэфедэщтыгъ, гъэнэфагъэуи ишIуагъэ къакIощтыгъ.

Тисабыигъом тыкъэпскагъэми, чъыIэр къытхэхьагъэми «йоднэ сеткэ» къытфашIыти, тагъэхъужьыщтыгъ. Зеленкэр зимыIэм йодыр уIагъэм е теутыгъэм щафэщтыгъ. Тхыкъупшъхьэм щамыфэу ыбгъухэм йодыр ащызэпырагъэтхъыкIыщтыгъ, сыдми, Iэзэгъушхуагъ.

Джы бэрэ ар агъэфедэжьырэп, Iэзэгъу уцхэм, препарат зэфэшъхьафхэм тыдахьыхыгъ. Ау ащыгъупшэгъэ IэзакIэр зыгу къэзыгъэкIыжьыхэрэми, зыгъэфедэхэрэм япчъагъи макIэп.

Йодыр цIыфым ищыкIэгъэ микроэлементхэм зэращыщыр медицинэм къызигъэшъыпкъагъэм лIэшIэгъу пчъагъэхэр тешIэжьыгъ. Ащ пае ишIуагъэ кIодыгъэп, зыныбжь хэкIотагъэхэм нахьыбэу джыри ар агъэфедэ.

Укъэмысымэджагъэми, уз гъэтIылъы­гъэ уимыIэми, йодыр плъэгу чIэгъ щыпфэу чэщым узыгъолъыжьыкIэ, пкъы­шъолымкIэ дэгъу. Йодыр цIыфым фимыкъу зыхъукIэ, ыкIышъо хъупцIын ылъэкIыщт. Ежьыр шIэхэу пшъэу, чэфынчъэу, ичъые къыщыкIэу, чъыIалIэу щытыщт. Ахэм зэкIэми защиухъумэнымкIэ йодым ишIуагъэ къэкIощт.

БэшIагъэу экспертхэми эндокринолог­хэми агъэунэфыгъэу щыт пчыхьэм лъэ­дакъэм щыпфэрэ йодым лъым дэ­гъоу Iоф зэрэригъашIэрэр, лъакъохэр зэримыгъэпщыхэрэр, температурэр зэрэдигъэкIуаерэр, нэмыкIхэри. Хэти ышъхьэкIэ ахэр ыуплъэкIунхэ ылъэкIыщт.

Йодыр Iэзэгъоу къэнэжьы, ащ епшIэмэ мыхъущт закъор кIышъом зэфэдэу щыпфэныр ары, тыристыкIыщт.

Пкъышъолым йодыр ищыкIагъэмэ къызэрэпшIэн амали щыI. Лъэгум щыпфэрэ йодым пчэдыжьым нэс лъэуж къытыринагъэмэ, организмэм ар ищыкIагъэп, хэлъыр фекъу. Йодыр организмэм хэхьагъэмэ, лъакъом лъэуж теплъэгъощтэп. Ар тхьамафэм зытIо- зыщэ зыщыпфэмэ икъунэу врачхэм къаIо.