Адыгеим и ЛIышъхьэу КъумпIыл Мурат Росгвардием Адыгэ Респуб­ликэмкIэ и ГъэIоры­шIапIэ иIофы­шIэхэмрэ икъулыкъушIэхэм­рэ яспорт­комплексэу зэхъокIыныгъэхэр зы­фа­­шIыгъэм иамалхэм тыгъуасэ защигъэ­гъозагъ.

Республикэм и ЛIы­шъхьэ игъусагъэх Адыгэ Республикэм хэгъэгу ­кIоцI IофхэмкIэ иминист­рэу Олег Безсмельни­цыныр ыкIи Росгвар-дием и ГъэIорышIапIэу ­Адыгеим щыIэм ипащэу Иван Гричановыр.

Росгвардием ичIыпIэ гъэIорышIапIэ ипащэ ­Адыгэ Республикэм и ЛIышъхьэ къыфиIотагъ спортивнэ псэуалъэу агъэ­федэнэу атIупщыгъэм фэгъэхьыгъэу. Ащ къызэ­рэхигъэщыгъэмкIэ, рес­публикэм ипащэхэм яшIуа­гъэкIэ игъэкIотыгъэ Iоф­шIэнхэр зэшIуахыгъэх: инженернэ системэхэр зэблахъугъэх, тренажернэ залыр агъэцэкIэжьыгъ. Ащ нэмыкIэу бассейнэм пае инфраструктурэр агъэу­цугъ: псыр зэрау­къэбзыщтыр, зэрагъэфэ­бэщтыр ыкIи унэм жьы къабзэ къизгъэхьащт пкъы­­гъохэр.

Республикэм ипащэу КъумпIыл Мурат ГъэIорышIапIэм ипащэхэм ыкIи иIофышэхэм афэгушIуагъ спорткомплексым иIоф­шIэн зэрэригъэжьагъэм пае ыкIи Iофэу зыфэ­гъэзагъэхэм гъэхъагъэхэр щашIынхэу афиIуагъ. Рес­публикэм и ЛIышъхьэ къызэрэхигъэщыгъэмкIэ, Росгвардием хэтхэм якъу­лыкъу лъэныкъуабэмэ япхыгъэу, къинэу щыт, арышъ, мыщ фэдэ спортивнэ псэуалъэхэр ахэм ящыкIэгъэ шъыпкъэх. Ащ фытегъэпсыхьэгъэ Iоф­шIэныр тапэкIи лъагъэ­кIотэщт.

«ГъэцэкIэжьын IофшIэнхэр зэкIэ аухыгъэх, Рос­гвардием иIофышIэхэм джы амал яIэ хъугъэ спор­тым пылъынхэмкIэ ящыкIагъэхэр зэрагъоты­лIэжьынхэу, гуIэтыпIэу щыт унэхэм япкъышъол ащапсыхьанэу. Якъулыкъу пшъэрылъхэр дэгъоу агъэ­цэкIэнхэмкIэ сицыхьэ телъ а пстэуми яшIуагъэ къызэрэкIощтым», — къы­Iуагъ КъумпIыл Мурат.

Адыгеим и ЛIышъхьэ къызэрэхигъэщыгъэмкIэ, социальнэ проектхэм япхырыщын фэгъэхьыгъэу къэпIон хъумэ, респуб-­ли­кэм ихабзэ игъэцэкIэкIо къулыкъухэр ренэу хьазырых ведомствэм IэпыIэгъу фэхъунхэу. Хабзэр мыу­къогъэнымкIэ ахэм пшъэ­рылъышхо зэшIуахы.

Мы мэфэ дэдэм СДЮШОР-у N 1-м иба­тутистхэм зызэрагъасэрэм КъумпIыл Мурат зыщигъэгъозагъ. Гимнасти­кэмкIэ ыкIи батутымкIэ гупчакIэр ашIыфэ нэс спортсменхэм Росгвар­дием испорткомплекс пIэ­лъэ гъэнэфагъэкIэ зыщагъэхьазырын алъэ­кIыщт. Республикэм и ЛIышъхьэ тренерхэм ыкIи ахэм агъасэхэрэм гущы­Iэгъу афэхъугъ, текIоныгъакIэхэр къыдахынхэу, ямурадхэр щыIэныгъэм гъэхъагъэ хэлъэу щыпхыращынхэу афэлъэIуагъ.

Адыгэ Республикэм и ЛIышъхьэ ипресс-къулыкъу