Гъэтхасэхэр Iуахыжьых, рапсыр халъхьэ
Адыгеим ичIыгулэжьхэм бжыхьэ мэфэ фабэхэр къызфагъэфедэзэ, гъэтхасэхэм яIухыжьын лъагъэкIуатэ.
АР-м мэкъу-мэщымкIэ и Министерствэ Iоныгъом и 13-м тызэрэщигъэгъозагъэмкIэ, тыгъэгъэзэ гектар 63669-м щыщэу 23702-р Iуахыжьыгъ, зым, гурытымкIэ лъытагъэу, центнер 20,5-рэ къеты. Мы уахътэм анахьыбэу, ар центнер 24,7-рэ, къизыхырэр Красногвардейскэ районым ичIыгулэжьхэр ары.
Чылапхъэ ашIыщт натрыфым иIожьын Кощхьэблэ, Красногвардейскэ ыкIи Шэуджэн районхэм яхъызмэтшIапIэхэр фежьагъэх. ГурытымкIэ лъытагъэу, центнер 65,6-рэ къы-рахы, тонн 8176-рэ къаугъоижьыгъ. ЗэкIэмкIи республикэм щыхалъхьэгъагъэр гектар 18578-рэ.
БылымIус ашIыщт натрыфыр гектар 1528-рэ хъущтыгъ, 1261-р Iуахыжьыгъах, тонн 25892-рэ къаугъоижьыгъ.
Сое гектар 11452-у мыгъэ тичIыгулэжьхэм апхъыгъагъэм щыщэу 2630-р ары Iуахыжьыгъэр, гурытымкIэ лъытагъэу, зы гектарым центнер 20,4-рэ къеты, тонн 5369-рэ къаугъоижьыгъ.
ХэтэрыкIхэр гектар 294-м ехъущтыгъэх. Ахэр зыгъэтIысхьэгъагъэхэм зэкIэми Iуахыжьы, тонн 940-рэ къырахыгъ.
Нашэр, хъырбыдзыр, къэбжъыер Джэджэ, Кощхьэблэ, Красногвардейскэ, Мыекъопэ ыкIи Шэуджэн районхэр ары зыщагъэтIысхьэгъагъэхэр. ЗэкIэмкIи гектар 511,7-рэ хъущтыгъ. Ахэр Iуахыжьыгъахэх, тонн 2272-рэ пстэумкIи къырахыжьыгъ.
Гъэтхасэхэм яIухыжьын дакIоу бжыхьэсэ лэжьыгъэхэр халъхьэх. Министерствэм къызэритыгъэмкIэ, гектар 109567-рэ мыгъэ ахэм арагъэубытынэу агъэнэфагъ. Ащ щыщэу 9982-м бжыхьэсэ хьэр халъхьащт, коцым пай агъэнэфагъэр гектар 88556-рэ мэхъу. Джащ фэдэу тритикале гектар 281-рэ, кIымэфэ чъыIэм «ымыгъащтэрэ» рапсэу гектар 10678-рэ апхъыщт.
ХъызмэтшIапIэхэр зэкIэ джыри бжыхьасэхэм япхъын фежьагъэх. Мы уахътэм рапсыр ары халъхьэрэр, гектар 8642,6-рэ хагъэкIыгъ.
ХЪУТ Нэфсэт.