Лъэпкъ проектэу «Щынэгъончъэ ыкIи шэпхъэшIухэм ади­штэрэ гъогухэр» зыфиIорэм гъогурыкIоныр щынэгъончъэ, хъугъэ-шIагъэхэр нахьыбэу зытехъухьэрэ чIыпIэхэр нахь макIэ шIыгъэнхэр къыдыхэлъытагъэх.

Гъогур щынэгъончъэ хъуным пае ар бгъэцэ­кIэжьын закъор икъурэп. Зэхэубытагъэу Iофтхьэбзэ зэфэшъхьафыбэ ащыгъэцэкIэгъэн фаеу щыт. Адыгеим гъогоу щагъэ­кIэжьыгъэхэр щынэгъончъэнхэм пае зэшIуахыщтхэм АР-м и ЛIышъхьэу КъумпIыл Мурат кIэщакIо афэхъугъ ыкIи а пшъэ­рылъыр гъэцэкIагъэ зэ­рэхъурэм ренэу ынаIэ тет. Ахэм шIуагъэ къызэра­тырэр цIыфхэм еплъыкIэу яIэхэм къаушыхьаты. Республикэм игъогухэм нахьышIум ылъэныкъокIэ зэхъокIыныгъэхэр зэрафэхъугъэхэр бэмэ къыхагъэщыгъ.

Лъэпкъ проектым къыдыхэлъытагъэу, гъэцэ­кIэжьынхэм ямызакъоу, гъогу зэхэкIыпIэхэм тамыгъэхэр ащагъэкIэжьых, лъэсрыкIохэр бэу зыщызэблэкIырэ чIыпIэхэм ыкIи гъэсэныгъэм иучреждениехэм адэжькIэ гъогухэм теIэтыкIыгъэ чIыпIэ­хэр ащагъэпсых, зэпырыкIыпIэхэр агъэтхъы­жьых. Ащ фэдэ екIолIакIэм ишIогъэшхо къызэ­рэкIорэм щэч хэлъэп.

Мы лъэпкъ проектым игъэцэкIэнкIэ пэрытныгъэ зыIыгъ шъолъырхэм Адыгеир ащыщ. Респуб­ли­кэм игъогушIхэр гъэхъа­гъэу яIэхэм къащымыуцу­хэу ыпэкIэ лъыкIо­тэнхэм, шъолъырым ипащэ­хэм къа­гъэуцурэ пшъэ­рылъхэр зэрифэшъуашэу зэшIуа­хынхэм фэхьазырых. Мы илъэсым телъы­тэгъэ Iоф­тхьабзэхэр гухэ­лъэу щы­Iэм диштэу зэшIуахых.