Дунэе Адыгэ Хасэм (ДАХ-м) и Хэсашъхьэ изичэзыу зэха­хьэ, «Адыгэм и Маф» зыфиIорэ мэфэкIыр Iоныгъом и 9 — 10-м Налщык щыкIуагъэх.

2022-рэ илъэсым, щылэ мазэм къыщегъэжьагъэу Iоныгъом нэс ДАХ-м Iоф зэришIагъэм фэгъэхьыгъэу къэгущыIагъэх ДАХ-м ипрезидентэу Сэхъурэкъо Хьаутий, республикэ общественнэ движениеу «Адыгэ Хасэм» итхьаматэу ЛIымыщэкъо Рэмэзан, Къэбэртэе Адыгэ Хасэм итхьаматэу ХьэшIуцIэ Му­хьамэд, Шапсыгъэхэм я Адыгэ Хасэ итхьаматэу КIакIыхъу Мэджыд, Къэрэщэе-Щэрджэсым и Адыгэ Хасэ итхьаматэу Аслъэнэ Алый, ДАХ-м игъэцэкIэкIо куп хэтхэу Евуз Бэчыр, Щекерджи Йылдыз.

Зэхахьэм яеплъыкIэхэр къыщызыIотагъэхэм къызэрэхагъэщыгъэу, IофшIагъэу яIэр лъыгъэкIотэгъэн фае. Ащ фэгъэхьыгъэ унашъохэр аштагъэх.

Адыгэ лъэпкъым щыщ цIыф цIэрыIохэм, анахьэу Тыркуем щыпсэухэрэм, ящыIэкIэ-псэукIэ нахь куоу щыгъэгъозэгъэнхэм ДАХ-р зэрэхэлэжьэщтым тегущыIагъэх. Интернетым иамалхэр къызыфагъэфедэхэзэ унашъоу ашIыгъэхэр зэрагъэцэкIэщтхэр зэфахьысыжьыгъэх. ДАХ-р ылъэ теуцоным ча­нэу хэлэжьагъэхэм яхьы­лIэгъэ къэбархэр лъэхъаным диштэу зэрагъэшIэщтых, тхыгъэхэр къыхаутыщтых.

Хэхэс адыгэхэр

Тилъэпкъэгъухэу IэкIыб къэралхэм ащыпсэухэрэм ятарихъ чIыгу къагъэзэ­жьыным фэшI зэлъыIэсыкIэ амалэу щыIэхэр на­хьышIоу гъэфедэгъэнхэм яхьылIэгъэ Iофыгъохэр зэ­хахьэм къыщаIэтыгъэх. Къэбэртэе-Бэлъкъарым ащ ехьылIэгъэ Iофтхьабзэхэр зэрэщагъэцакIэхэрэр хэу­шъхьафыкIыгъэу къыха­гъэщыгъ.

Хэбзэ къулыкъушIэхэмрэ ДАХ-м икъутамэхэу рес­публикэхэм, нэмыкI шъо­лъырхэм ащыIэхэмрэ Iофым къызэрэхэлэжьэщтхэм ехьылIэгъэ унашъохэр зэхахьэм щаштагъэх.

Тыркуем ис адыгэхэм нахьыбэрэ аIукIэнхэм, лъэпкъ шIэжьым ехьылIэгъэ Iофтхьабзэхэр зэхэ­щэгъэнхэм мэхьанэу ратырэм нэбгырабэ къытегущыIагъ.

Тилъэпкъэгъухэу IэкIыб къэралхэм арысхэм адыга­бзэр, урысыбзэр зэрагъэшIэнхэм къытегущыIагъэх ДАХ-м ипрезидент игуа­дзэу Шэуджэн Аминэт, ДАХ-м игъэцэкIэкIо куп хэтэу Табыщ Мурат, нэмыкIхэри. Интернетыр, нэмыкI зэлъыIэсыкIэ амал­хэр агъэфедэхэзэ бзэм изэгъэшIэн тапэкIи пы­лъыщтых.

Урысыем икъэралыгъо политикэу тихэгъэгогъухэу IэкIыб къэралхэм ащыпсэу­хэрэм яхьылIагъэм фэгъэхьыгъэу зэхахьэм пса­лъэ къыщишIыгъ ДАХ-м ипрезидент иупчIэжьэгъоу, рес­публикэ общественнэ движениеу «Адыгэ Ха­сэм» игъэцэкIэкIо куп хэ­тэу МэщфэшIу Нэдждэт.

Урысыем щаштэгъэ законэу IэкIыбым щыIэхэм ягу­мэкI-гупшысэхэр нахьышIоу зэгъэшIэгъэнхэм, хэ­бзэ шапхъэхэм адиштэу Iофхэр лъыгъэкIотэгъэнхэм яхьылIэгъэ унашъохэр зэ­хахьэм щаштагъэх.

КIэлэцIыкIухэм, ныбжьыкIэхэм языгъэпсэфыгъо уахътэ гъэшIэгъонэу зэхащэным ехьылIэгъэ Iоф­хэм шъхьафэу атегущы­Iагъэх.

Адыгеим икIыгъэхэу ЛIымыщэкъо Рэмэзан, Мэщ­фэшIу Нэдждэт, ЦIыкIушъо Аслъан, ГъукIэлI Сусанэ, Хъот Юныс, Хьаблаукъо Адам ДАХ-м изэ­IукIэхэм, адыгэм имэфэкI ахэлэжьагъэх.