ГъогурыкIоным ишапхъэхэр яцIыкIугъом къыщегъэжьагъэу ябгъэшIэным мэхьанэ зэриIэр къагурыIозэ, инспекторхэм Iофтхьэбзэ зэфэшъхьафхэр кIэлэеджакIохэм афызэхащэх. Ахэм зэу ащыщ бэмышIэу Мыекъуапэ щыкIогъэ «Шагающий автобус» зыфиIорэр.

Ащ къыдыхэлъытагъэу Адыгэ Республикэм кIэлэцIыкIухэм яфитыныгъэхэр къэухъумэгъэнхэмкIэ и Уполномоченнэу Наталья Агеевар Къэралыгъо автоинспекторхэм ягъусэу мыгъэ апэрэ классым ихьагъэхэм аIукIагъэх.

Пшъэрылъ шъхьаIэу Iофтхьабзэм иIагъэр кIэлэцIыкIухэр еджапIэм зэрыкIощтхэ гъогу щынэгъончъэхэр къыхахынхэр икIэрыкIэу кIаджыкIыжьыныр, гъогурыкIоным ишапхъэу амы­шIэхэрэр агурыгъэIогъэнхэр ары.

Iофтхьабзэм ипэублэ полицейскэхэм кIэлэеджакIохэр лъэс­рыкIо гъогум тыращагъэх. Ащ узэрэтетыщт ыкIи машинэхэр зыщызекIохэрэ гъогур зэрэзэпыпчыщт шIыкIэхэр кIарагъэджыкIыжьыгъ. Джащ фэдэу нэфрыгъуазэм шъо зэфэшъхьафэу иIэхэм ямэхьанэ агу къагъэ­кIыжьыгъ. АмыгъэIорышIэрэ лъэсрыкIо зэпырыкIыпIэм сакъы­ныгъэ анахьэу къызэрэзыщыхагъэфэн зэрэфаем анаIэ тырарагъэдзагъ. Нэфынэр къэзытырэ пкъыгъохэр агъэфедэнхэр зыщамыгъэгъупшэнэу араIуагъ.

КъафаIотагъэр агъэпытэным фэшI зэкIэри зэхэтхэу «Шагающий автобус» зыфиIорэм фэдэу еджапIэм нэс къэкIожьыгъэх. Къэралыгъо автоинспекторхэм Iофтхьабзэм хэлэжьагъэхэм нэфынэр къэзытырэ пкъыгъохэр афагощыгъэх.

Iэшъынэ Сусан.