Адыгеим и Къэралыгъо автоинспекторхэм волонтер-медикхэр ягъусэхэу водительхэр ешъуагъэу мызекIонхэм къыфэджагъэх. Зичэзыу Iофтхьабзэу, Урысыем емышъоным и Мафэ фэ­гъэхьыгъэр, волонтер-медик­хэр яIэпыIэгъухэу рагъэкIокIыгъ. Республикэм икъэлэ шъхьаIэ анахь транспортыбэ зыщызе­кIорэ игъогухэм ахэр къатехьагъэх. Псауныгъэм зэрар езыхырэ шIыкIэхэр водительхэм щагъэзыенхэм ахэр къыфэджагъэх. Iофтхьабзэм изэхэщакIохэм водительхэр къагъэуцухэзэ, шъон пытэхэм зэрарэу псауныгъэм къыфихьырэр, ащкIэ щынагъоу къэуцухэрэр къафаIотагъэх. Джащ фэдэу автомобилыр зикIасэхэм агу къагъэкIыжьыгъ а хэбзэукъоныгъэр зезыхьэрэм къежэрэ административнэ ыкIи уголовнэ пшъэдэкIыжьыр зыфэдэр. ЦIыфхэм яшIошIхэр къыраIолIагъэх ыкIи зэхэфын Iоф­тхьабзэр зэрэзэхащагъэмкIэ къазэрэфэразэхэр къыраIотыкIыгъ. Ешъоныр щыгъэзыегъэнэу зэрэщытыр нахь зэлъарагъэшIэным пае инспекторхэмрэ волонтер-медикхэмрэ гукъэкIыжь тхьапэхэр водительхэм афагощыгъэх.   Iэшъынэ Сусан.