Iоныгъом и 11-м, хэдзынхэр Урысыем исубъ­ектхэм зыщащыкIогъэхэ мафэм, АР-м и Къэ­ралыгъо Совет — Хасэм ия XIV-рэ зэхэсыгъо Адыгэ Республикэм и ЛIышъхьэ щыхадзыжьыгъ.

Iофтхьабзэм хэлэжьагъэх УФ-м и Президент и Полномочнэ ЛIыкIоу Къыблэ Федеральнэ шъо­лъырым щыIэ Владимир Усти­новыр, Абхъаз Республикэм и Президентэу Бжания Аслан, Къэ­рэщэе-Щэрджэс Республикэм ипащэу Рашид Темрезовыр, Адыгеим и Президентыгъэу Джарымэ Аслъан, и ЛIышъхьагъэу ТхьакIущынэ Аслъан, УФ-м и Общественнэ палатэ хэтэу, УФ-м IофшIэнымкIэ и ЛIыхъужъэу Мэщ­бэшIэ Исхьакъ.

Джащ фэдэу АР-м и ЛIышъхьэ зыщыхадзыжьыщт зэхэсыгъом хэлэжьагъэх гъунэгъу Краснодар краим игубернатор и Администрацие ипащэ игуадзэу Игорь Чагаевыр, Темыр Осетием — Аланием и Премьер-министрэу Борис Джанаевыр, Чэчэн Республикэм и Пра­вительствэ и Тхьаматэу Муслим Хучие­выр, Ингуш Республикэм и Премьер-­министрэу Владимир Сластениныр, Астраханскэ хэкум и Правительствэ и Тхьа­матэу Олег Князевыр, Дагъыстан Рес­публикэм и Премьер-министрэ игуа­дзэу Мурат Казиевыр, Волгоградскэ хэкум игубернатор игуадзэу Василий Ивановыр, Къэбэртэе-Бэлъкъар Рес­публикэм и ЛIышъхьэ и Администрацие ипащэу Мухамед Кодзоковыр, Къал­мыкъ Республикэм и ЛIышъхьэ и Администрацие ипащэу Чингиз Бериковыр, УФ-м и Федеральнэ ЗэIукIэ исенаторхэр, Къэралыгъо Думэм идепутатхэр, хэбзэ гъэцэкIэкIо органхэм, муниципальнэ образованиехэм япащэхэр, нэмыкIхэр. Зэхэсыгъор зэрищагъ АР-м и Парламент и Тхьаматэу Владимир Нарожнэм.

УФ-м и Президент и Полномочнэ лIыкIоу Къыблэ Федеральнэ шъолъырым щыIэ Владимир Устиновым зэхэсыгъом пэублэ псалъэ къыщишIыгъ. Федеральнэ хэбзэгъэуцугъэм диштэу, 2022-рэ илъэ­сым ишышъхьэIу мазэ и 19-м УФ-м и Президентэу Владимир Путиным АР-м и ЛIышъхьэ хъунымкIэ кандидатурищ къызэригъэлъэгъуагъэр ащ агу къыгъэ­кIыжьыгъ. УФ-м и Президент итхыгъэу АР-м и Къэралыгъо Совет — Хасэм и Тхьаматэ фэгъэзагъэм ар къеджагъ.

Кандидатурэу зыцIэ къыриIуагъэхэр АР-м и Къэралыгъо Совет — Хасэм идепутатэу, ООО-у «ЖилМонтажСервис» зыфиIорэм июрист-упчIэжьэгъоу Евгений Груниныр, АР-м и ЛIышъхьэу КъумпIыл Мурат ыкIи АР-м и Парламент хэбзэгъэуцунымкIэ, законностымкIэ ыкIи чIыпIэ зыгъэIорышIэжьыпIэхэм яIофхэмкIэ и Комитет ипащэу Александр Ло-­ бода.

УФ-м и Президент и Полномочнэ лIы­кIо Адыгеим и Парламент идепутатхэм закъыфигъазэзэ, шъыпкъагъэ хэ­лъэу, республикэм щыпсэухэрэм яшIоигъоныгъэхэр къыдалъытэзэ кандидатурэхэм ахэдэнхэм зэрэщыгугъырэр къыIуагъ. Нэужым зикандидатурэ къагъэлъэгъуагъэхэр къэгущыIагъэх, Iоф зэрашIэщт программэу къагъэхьазырыгъэхэм нэ­Iуасэ афашIыгъэх. Джащ фэдэу политическэ партие зэфэшъхьафхэм яфракциеу Къэралыгъо Советым — Хасэм хэтхэм япащэхэр къэгущыIагъэх. Зикандидатурэ къагъэлъэгъуагъэхэм лъэныкъоу зыфэгъэзагъэ­хэм хэшIыкIышхо зэрафыряIэр къыхагъэщызэ, илъэситфым республикэм ипэ­щагъэу, ежьыри икоманди пшъэры­лъэу яIэхэр зэрэпхыращышъущтхэр къэ­зыгъэлъэгъогъэ КъумпIыл Мурат ама­къэхэр фатыхэмэ нахьышIоу зэра­лъытэрэр къыкIагъэтхъыгъ.

Ащ ыуж шъэф шIыкIэм тетэу зэхащэгъэ мэкъэтыным Парламентым идепутат нэбгырэ 49-мэ зэкIэми ащ зэрэдырагъа­штэрэр къыгъэлъэгъуагъ. Ащ тетэу Къум­пIыл Мурат ятIонэрэу Адыгэ Рес­пуб­ли­кэм и ЛIышъхьэ IэнатIэ Iуагъэ­хьажьыгъ.

Мы мэфэ дэдэм ащ фэгъэхьыгъэ зэхахьэр щыIагъ. Ари Парламентым и Тхьаматэу Владимир Нарожнэм зэрищагъ. ЫпэрапшIэу республикэм ипащэу хадзыжьыгъэ КъумпIыл Мурат тхьэлъанэ ытынэу къыригъэблэгъагъ. Республикэм икъэралыгъуабзэхэу урысыбзэмрэ адыга­бзэмрэкIэ ар къыIуагъ. Ащ ыуж, законым зэритым тетэу, Адыгеим и Конституцие итекст, ибыракъ ыкIи итамыгъэ ­раты­гъэх, АР-м и ЛIышъхьэ зэрэхъугъэр къэзыушыхьатырэ тхылъыр фагъэшъошагъ.

Инаугурацием къекIолIагъэхэм ащыщ­хэри къэгущыIагъэх. ЗэкIэмэ апэу Къум­пIыл Мурат къыфэгушIуагъ Владимир Устиновыр.

— Депутатхэм зэдаштэу КъумпIыл Мурат амакъэхэр фатыгъэх. Ащ ежьыри икоманди яIофшIэн осэшхо къызэрэфашIыгъэр къегъэлъагъо. Илъэситфым зэшIохыгъэ хъугъэр макIэп. КъумпIыл Мурат Iофыгъо пстэумэ адэлэжьэн зэрилъэкIыщтыр а уахътэм къыгъэлъэ­гъуагъ. Адыгеим хэхъоныгъэхэр езыгъэ­шIын амалыбэ иI. Ахэр тапэкIи гъэфедагъэ зэрэхъущтым сицыхьэ телъ, — къыIуагъ Полномочнэ лIыкIом.

Ащ ыуж КъумпIыл Мурат къыфэгу­шIуагъэх Абхъаз Республикэм и Президентэу Бжания Аслан, Къэрэщэе-Щэр­джэс Республикэм ипащэу Рашид Темрезовыр, УФ-м ФедерациехэмкIэ и Совет Краснодар краимкIэ исенаторэу Владимир Бекетовыр.

УФ-м и Общественнэ палатэ хэтэу, зэлъашIэрэ тхакIоу, УФ-м IофшIэнымкIэ и ЛIыхъужъэу МэщбэшIэ Исхьакъ ыпэрапшIэу ежь ышъхьэкIэ къыфэгушIуагъ, КъумпIыл Мурат пшъэрылъэу иIэнатIэ къыфигъэуцурэр хэзыгъэ имыIэу зэригъэцэкIэщтыр, цIыфхэм ягугъэ къызэригъэшъыпкъэжьышъущтыр уахътэм къызэригъэлъэгъуагъэр къыхигъэщыгъ, тапэкIи ащ тетэу иIофшIэн лъигъэкIотэн амал иIэнэу къыфэлъэIуагъ. Нэужым ащ Адыгеим и ЛIышъхьагъэу Шъэумэн Хьазрэт къызщыфэгушIорэ тхыгъэр Къум­пIыл Мурат къыритыжьыгъ.

ЗэкIэмэ ауж КъумпIыл Мурат гущыIэр зештэм, АР-м и Парламент идепутатхэу цыхьэ къыфашIи джыри зэ зыма­къэхэр фэзытыгъэхэм, къэгущыIагъэу, дэхабэ къыфэзыIуагъэхэм «тхьашъуе­гъэпсэу» къариIуагъ.

— СэркIэ шъуашэ, ащ дакIоуи пшъэ­дэкIыжьышхо сапашъхьэ къырегъэуцо джыри зэ мы IэнатIэм сызэрэIуагъэ­хьажьыгъэм. ЗэкIэмэ апэу сирэзэныгъэ фэзгъазэмэ сшIоигъу Урысые Федерацием и Президентэу Владимир Путиным кIуачIэ къыситэу илъэситфым къотэгъу къызэрэсфэхъугъэм, ятIонэрэ пIалъэмкIи сикандидатурэ къызэригъэлъэгъуагъэм афэшI. Адыгеим щыпсэурэ цIыф лъэпкъ зэфэшъхьафыбэу цыхьэ къысфэзышIы­хэрэм, республикэм зыгу фэузыхэрэм, ащ хэхъоныгъэхэр ышIынхэм пае тапэкIи IэпыIэгъу хъунхэм фэхьазырхэм сафэраз. ЗэкIэми цыхьэ къысфэшъушIыгъ, ар къэзгъэшъыпкъэжьынэу сыхьазыр, — къыIуагъ КъумпIыл Мурат.

Лъэныкъо зэфэшъхьафыбэхэмкIэ рес­публикэм хэпшIыкIэу хэхъоныгъэхэр зэришIыгъэхэр ЛIышъхьэм къыхигъэщыгъ. ЗэхъокIыныгъэшIухэр цIыфхэм алъэгъух, тапэкIи ахэм къяжэх.

— ТапэкIи ащ тызэдеIэжьзэ тыдэлэжьэщт. Адыгеим щыпсэухэрэр зэзыпхырэ зыкIыныгъэр, зэдеIэжьыныр, ­Iо-фэу етхьыжьагъэм, ти Родинэ тафэ­шъыпкъэн шэнышIухэр тиIэубытыпIэхэу Iоф зэдэтшIэщт. Тиреспубликэ щыIэкIэшIу илъыным, бизнесым зиушъомбгъуным, гъэпсэфыпIэ чIыпIэ дахэ хъуным, илъэс къэс хэхъоныгъэхэр ышIынхэм кIуачIэу тиIэр зэкIэ етхьылIэщт, — къы­зэфихьысыжьыгъ КъумпIыл Мурат.

КъумпIыл Мурат Адыгэ Республикэм и ЛIышъхьэу зэрэхадзыжьыгъэм фэшI «Адыгэ макъэм» щылажьэхэрэмкIи тыфэгушIо! Псауныгъэ пытэ иIэу, гу­хэлъ пстэури къыдэхъоу, итетыгъо кIыхьэу, бэгъашIэ хъунэу тыфэлъаIо!

ХЪУТ Нэфсэт. Сурэтхэр А. Гусевым тырихыгъэх.