Адыгэ Республикэм и ЛIышъхьэу КъумпIыл Мурат ыкIи Абхъазым и Президентэу Аслан Бжания Абхъазым игуфакIохэм ясаугъэт къэгъагъэхэр кIэлъыралъхьагъэх.

Абхъазым ишъхьафитыныгъэ фэбанэхэзэ Адыгеим щыщ гуфакIохэу лIыхъужъэу фэхыгъэ­хэм ясаугъэт зэхэтэу «ДзэкIо­лIым ипсынэкIэчъ» зыфиIорэр Мыекъуапэ къызыщызэIуахы-­ гъэр илъэс заулэ хъугъэ.

Тарихъым инэкIубгъохэр

1992-рэ илъэсым Грузиемрэ Абхъазымрэ язэфыщытыкIэхэр хэпшIыкIэу къеIыхыгъэх. Абхъа­зым и Апшъэрэ Советрэ Грузием ипащэхэмрэ зэмызэгъхэу кIуачIэкIэ зэпэуцугъэх. Грузием идзэхэр Абхъазым заокIэ зе­хьэхэм машIом зыкъиIэтыгъ. Грузием заом зэрэкIигъэсты­рэм фэшI Темыр Кавказым щыпсэурэ шъолъырхэм ягуфа­кIохэр Абхъазым къоуцуагъэх.

Заом къызыдихьыгъэ тхьамыкIагъохэм къахэкIэу нэбгырэ минишъэ пчъагъэхэм псэупIэ ямыIэжьэу ашъхьэ рахьыжьэ­жьыгъ — зыдэкIощтхэр амышIэу. 1992 — 1993-рэ илъэсхэм Абхъазым щыкIогъэ заом абхъаз­хэр, грузинхэр, нэмыкI лъэпкъхэр хэщагъэхэ хъугъэх.

Адыгеим щыщ гуфакIохэр япчъагъэкIэ 200 фэдиз хъухэу зэо хьылъэм хэлэжьагъэх. Абхъазым ишъхьафитыныгъэ фэбанэхэзэ нэбгыри 10 лIыхъу­жъэу зэрэфэхыгъэр тщыгъу­пшэрэп. Абхъазым лIыхъужъныгъэ щызезыхьагъэхэм орденхэр, медальхэр къафагъэшъошагъэх. ЛIыхъужъхэм ацIэхэр еджапIэ­хэм, урамхэм афаусыгъэх. Гу­факIохэм ацIэкIэ спорт зэнэ­къо­къухэр, лъэпкъ шIэжьым фэгъэхьыгъэ зэхахьэхэр зэ­хащэх.

«ДзэкIолIым ипсынэкIэчъ» зыфиIорэ саугъэтым Абхъазым и Президентэу Аслан Бжания, Адыгеим и ЛIышъхьэу КъумпIыл Мурат, хэбзэ къулыкъу­шIэхэр, общественнэ движениехэм ялIыкIохэр, ти УIэшыгъэ КIуачIэхэм яветеранхэр, Аб­хъазым игуфакIохэр, Абхъазым щыщ ныбжьыкIэхэу Адыгеим щеджэхэрэр щызэIукIагъэх. Патриотическэ пIуныгъэм фэгъэхьыгъэ орэдышъохэр пчэгум щыIугъэх. Абхъазым ишъхьа­фитыныгъэ фэбанэхэзэ лIы­хъужъэу фэхыгъэхэм зы такъи­къэ афэшъыгъуагъэх. ГуфакIохэм ясаугъэт къэгъагъэхэр кIэ­лъыралъхьагъэх.

КъумпIыл Мурат, Аслан Бжания Абхъазым къикIыгъэхэу Адыгеим щеджэхэрэ ныбжьыкIэхэм, гуфакIохэм, дзэм иветеранхэм гущыIэгъу афэхъугъэх.

ЗэIукIэгъухэм къащежьэ

Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр ветеранхэм, гуфа­кIохэм, студентхэм язэIукIэгъу мэхьэнэ ин иIэу ылъытагъ. За­пасым щыIэ генералхэу Александр Дорофеевым, Юрий Щепиным, Юрий Колягиным, Адыгэ Республикэм иветеранхэм я Совет итхьаматэу, запасым щыIэ полковникэу Къуаджэ Аслъан, Афганистан дзэ къулыкъур щызыхьыгъэу, запасым щыIэ майорэу Александр Яцевым, фэшъхьафхэм ныбжьыкIэхэр, гуфакIохэр аIукIагъэх. Псэ зыпыт зэдэгущыIэгъухэр гум шIукIэ къызэринэжьыщтхэр Абхъазым истудентхэм ти­зэдэгущыIэгъу щыхагъэунэфыкIыгъ. ЗэIукIэгъум зэфищагъэ­хэм нэпэеплъ сурэтхэр аты­рахыгъэх.

Абхъаз гуфакIохэм я Союз итхьаматэу Къуижъ Къэплъан хэбзэ къулыкъушIэхэм адыряIэ зэпхыныгъэм зызэриушъом­бгъурэр, лIэужхэр зэзыпхырэ Iофтхьабзэхэр зэрэлъагъэкIо­тэщтхэр къытиIуагъ.

Бзэр псэм щыщ

Гуманитар ушэтынхэмкIэ Адыгэ республикэ институтэу КIэрэщэ Тембот ыцIэ зыхьырэм щыкIогъэ пчыхьэзэхахьэм Адыгеим и ЛIышъхьэу КъумпIыл Мурат, Абхъазым и Президентэу Аслан Бжания къыщыгущыIагъэх.

Абхъазымрэ Адыгеимрэ язэфыщытыкIэхэр гъэпытэгъэнхэм, шIэжьым ехьылIэгъэ Iофхэр щыIэныгъэм щылъыгъэкIотэ­гъэнхэм афэшI лIэужхэм язэпхыныгъэхэм пIуныгъэ мэхьа- нэу яIэр КъумпIыл Мурат хи­гъэунэфыкIыгъ.

— Шъукъеблагъэх Абхъазым, тыгу зэIухыгъэу тызэIукIэщт. ЗыгъэпсэфыпIэ дэгъухэр тиIэх, — къыIуагъ Аслан Бжания.

Бзэр псэм зэрепхыгъэ шIыкIэм къытегущыIагъэхэм уядэ­IункIэ гъэшIэгъонэу щытыгъ. Гуманитар ушэтынхэмкIэ Адыгэ республикэ институтым ипащэу, шIэныгъэлэжьэу ЛIыIужъу Адам зэхахьэм къыщиIотагъэр макIэп. Адыгэ Республикэм и Парламент иапэрэ Тхьаматэу А. ЛIыIужъур тиреспубликэ имызакъоу, Абхъазым шIукIэ щашIэ.

Грузиер заокIэ Абхъазым ичIыгу къызехьэм А. ЛIы­Iужъур Адыгеим и Парла­мент и Тхьаматэу зэрэщытыгъэр зэ­­хахьэм къыщыхагъэщыгъ.

— Адыгэ Республикэм инароднэ артисткэу Нэхэе Тэмарэ зэлъашIэрэ орэдэу «Синан» зыфиIорэр Абхъазым тыщыIэу къызыхедзэм, абхъазхэм адыга­бзэкIэ орэдыр къызэраIорэр сшIогъэшIэгъоныгъ, — хигъэу­нэфыкIыгъ А. ЛIыIужъум.

Зэхахьэр зыщыкIорэ залым джэныкъо машIом исурэт дахэу къызэрэщылъагъорэм тигъэгушIуагъ. ГуфакIохэм яджэныкъо машIо гъашIэм зэрэщы­мыкIосэщтыр сурэтымкIи къыб­гурыIонэу щыт.

ЕплъыкIэхэр

ГуфакIохэу ЛIышэ Мэдин, Къуижъ Къэплъан, Бэгъушъэ Адам, Хэкужъ Адам, ХьапэкIэ Аслъан, Ацумыжъ Аслъан, ЛIыхъурэе Заур, Хьабэхъу Зэ­чэрый, Гъуагъо Руслъан, Чэ­сэбый Шыхьам, нэмыкIхэм зэ­фэхьысыжьхэр ашIыгъэх. Зэ­хахьэм къыщаIуагъэм бэмэ уарегъэгупшысэ.

Абхъазыр дунэе зыгъэпсэ­фыпIэ дахэхэм ягупчэу алъытэ. Лъэпкъхэр зэфэзыщэхэрэ унэ­хэу культурэм, искусствэм япхыгъэхэр щыгъэпсыгъэнхэм, республикэхэр нахьышIоу зэрэшIэнхэм, ныбжьыкIэхэр зэлъыкIонхэм, лъэпкъ шэн-хабзэхэр щыIэныгъэм щызэрахьанхэм, фэшъхьафхэм яеплъыкIэхэр къараIолIагъэх.

ГуфакIохэм яшIуагъэкIэ Абхъазым зэо хьылъэм текIоныгъэр къызэрэщыдихыгъэр Аслан Бжания хэушъхьафыкIыгъэу зэхахьэм щыхигъэунэфыкIыгъ. Абхъазыр мамырэу псэуным, лэжьэным зэрэфэхьазырыр щы­Iэныгъэм илъэоянэхэм ащытэлъэгъу. Зэкъошныгъэгъэм ­игъогу мамыр щыIакIэм щэпытэ.

Зэкъош республикэхэу Адыге­им, Къэрэщэе-Щэрджэсым, Къэ­бэртэе-Бэлъкъарым я Унэ Абхъазым щыгъэпсыгъэнэу гуфа­кIохэр къыкIэлъэIугъэх. А. Бжа­ния ащкIэ адыригъэштагъ. Абхъазым я III-рэ шъуашэ зиIэ иорденэу «Ахьдз-Апша» зыфиIорэр ЛIыIужъу Адам зэха­хьэм къыщыфагъэшъошагъ. ЗэIукIэгъур гум шIукIэ къинэ­жьынэу кIуагъэ.

ЕмтIылъ Нурбый.