ЗэраIомэ, зэраIотэжьэу бэшIагъэу зы къуаджэ горэм цIыф мыпшъыжь гъэшIэгъон дэдэ дэсыгъ. Гупшысэн аIуагъэмэ зишIэжьыщтыгъэп: шхэни, плъэни, ешъони, Iони, шIэни, чэфыгъуи шIоIофыгъэп.

Мафэ горэм арэу плъэгъурэр зэресагъэу, ыпэ уашъом егъэкъу­жьыгъэу зиплъыхьэмэ, зиплъы­хьэзэ плъызэу, ежь-ежьырэу зы­дэгущыIэжьмэ зэушъыизэ, зэ­фэхьысыжьхэр ышIызэ кIощтыгъэ.

— Сыда цIыф цIыкIур мырэу нэикI-IуикIэу, зэмызэгъыжь-зэщыкIукIыгъэу зыкIыщытыр ыкIи зыкIэхъугъэр шъуIуа? — зэупчIы­жьыщтыгъэ. — Акъылынчъэмэ, шъугъуалэмэ, бзэгухьэмэ, пцIыусымэ, шъхьахынэмэ, тыгъуа­кIомэ… — джыри ащ бэ къып­чъын ыгу хэлъыгъэщтыр, ау ошIэ-дэмышIэу кIэцIэнлъыкIи, псынэм иукIорэягъ.

«Тэ укъикIи, лажь!» пкIэн­чъэу аIуагъэп.

Щтагъэм хэтэу мо фэлаплъэр зимышIэжьэу, лъэкIэу иIэмкIэ куощтыгъ:

— О мардж! ЦIыфхэр! СэлIэ гущ, шъукъыздеIэба! Псэр IэшIуба, зыфэщыIэщтыгъэп.

ГуIэ-щэIу макъэм мыщ дэ­жьым блэкIыщтыгъэхэм ащыщ горэ къыгъэуцуи, макъэр къыздиIукIырэр ымышIэу зэтекъагъ, етIанэ псынэм екIуалIи иплъагъ, насыпынчъэу гуIэрэр къылъэ­гъуи еупчIыгъ:

— Сыда, синыбджэгъу, къы­охъулIагъэу мыщ укъэзыхьыгъэр?

Адрэм ыгу плъыгъэу, дысэу къыреIожьы:

— Плъэгъурэба зэрэмыт­хъэ­гъо Iофыр, симыфагъэмэ, сэр-сэрэу мыщ сызэримыхьэщтыгъэр? IэпыIэгъу къысфэхъу, сыолъэIу, симымэхыхьапэу, симытхьалэзэ!.. — къэтхьаусыхагъ.

ПсынэIум Iутыр екуо:

— Угу теIункIэжь! Сэ моу кIэпсахьэ сыкIощт, ащкIэ укъисщыжьыщт. Ау сыкъэмыкIожьэу зыгорэм укIокъон, зэхэоха? ЕтIанэ сыкъыплъыхъужьынэу сэ уахътэ сиIэщтэп…

…Е-о-ой!.. Ащ нахь гъэшIэ­гъон цIыф къыIуагъэу шъошIа шъо? «СыкъэмыкIожьэу зыгорэм укIо­къон!» Псынэжъ куум ифэгъэ тхьамыкIэр тыдэ кIонэу къыщыхъугъа?

Мыр пасэм къяхъулIэгъэ къэ­бар. Ау арыщтын «зышъхьэ мыузырэм уишъхьэуз емыIуат» языгъэIуагъэр. Ежь фэдэ цIыфым игумэкI зэхэзышIэу, ащ фэгуIэн-фэулэун зылъэкIыщт цIыфэу щыIэр зэрэмакIэр хэти ешIэ, ау щыIэх зырыз дэдэхэр, хэти ашъо фытырахыжьэу, зышъхьамысыжьхэу. УзыIукIэу къыптефэрэм елъытыгъ.

 Мамырыкъо Нуриет.