Адыгеим и ЛIышъхьэу КъумпIыл Мурат Урысые зэнэкъокъоу «ИлъэсымкIэ щысэтехыпIэ унагъу» зыфиIорэм щатекIуагъэхэмрэ хэлэжьагъэхэмрэ афэгушIуагъ. Унэгъо кIоцIым илъ хабзэхэр къэзыухъумэрэ унэгъуабэ Адыгеим зэрисыр ащ хигъэунэфыкIыгъ.

Лъэныкъоу «Унэгъо зэгурыIожь» зыфиIорэмкIэ мы илъэсым Урысые зэнэ­къокъум щатекIуагъэр Хъурайхэм яунагъоу Теуцожь районым щыпсэурэр ары. Хъурэе Мирэрэ Рэмэзанрэ илъэс 54-рэ хъугъэу зы щыIэныгъэ гъогум зэдытетых. Ахэм кIэлитф зэдапIугъ, къорылъф-пхъо­рэлъфи 10 яI. Унагъом ышъхьэ ветврач-эпизоотологэу Iоф ышIагъ, къэралыгъо тынхэр къыфагъэшъошагъэх. Ащ ишъхьэгъусэ илъэс 44-рэ биологиемкIэ кIэлэегъаджагъ.

Iофтхьабзэм ишъолъыр чэзыу щате­кIуагъэхэр ары Урысые зэнэкъокъум хэлэжьагъэхэр. Лъэныкъоу «Сабыибэ зэрыс унагъу» зыфиIорэмкIэ атекIуа­гъэр Исаевхэм яунагъоу Мыекъуапэ дэсыр ары.

Лъэныкъоу «Унэгъо ныбжьыкI» зыфиIо­рэм щатекIуагъэр Чыржьынхэм яуна­гъоу Кощхьэблэ районым исыр ары. Лъэны­къоу «Къуаджэм дэс унагъу» зыфиIорэм текIоныгъэр къыщыдихыгъ Жуковхэм яунагъоу Мыекъопэ районым щыщым. Лъэныкъоу «Унэгъо кIоцI хабзэхэр зыгъэ­лъэпIэрэ унагъу» зыфиIорэмкIэ атекIуа­гъэр Тхьагъэпсэухэм яунагъоу Адыгэкъа­лэ дэсыр ары.

«КIэлэцIыкIухэм япIун шъузэрэдэмышъхьахырэм фэшI тхьашъуегъэпсэу шъосэIо. Унагъом кIэлэцIыкIухэм зэращыпылъхэм мэхьанэшхо иI. КIэлэцIыкIухэм сыдигъуи ны-тыхэм щысэ атырахы нахьыжъхэм, ныбджэгъухэм, Iахьылхэм узэрафыщытыщтымкIэ. ЦIыфым ишэн зыщыуцурэр унагъор ары. Ар зэгурыIожьэу щытынымкIэ, хэгъэгур шIу зэралъэгъун фаемкIэ, пшъэдэкIыжь зэрахьырэр къагурыIонымкIэ шъо щысэтехыпIэшIоу сыдигъуи шъу­щыт. Унэгъо зэгурыIожьыр обществэм зыпкъитыныгъэ иIэным, къэралыгъор пытэным афэIорышIэ», — къыIуагъ Къум­пIыл Мурат зэIукIэгъум хэлажьэ­хэрэм зафигъазэзэ.

Республикэм ипащэ зэрэхигъэунэфыкIыгъэмкIэ, сабыибэ зиIэ унагъохэу Адыгеим исхэм япчъагъэ илъэс къэс хэхъо. Непэ унэгъо 7800-м ехъу тиреспубликэ ис. Къэралыгъо политикэу зэрахьэрэмкIэ пшъэрылъ шъхьаIэхэм зэу ащыщ унагъохэм IэпыIэгъу ягъэгъотыгъэ­ныр.

«Загъорэ IэпыIэгъу зэраратырэр арэп зыфатIорэр. Республикэми, хэгъэгуми непэ зэхъокIыныгъэу афэ­хъухэрэр зытегъэпсыхьагъэр унагъо пэпчъ ищыIэ­кIэ-псэукIэ зыкъегъэIэтыгъэ­ныр ары. КIэлэцIыкIу IыгъыпIэхэмрэ гурыт еджа­пIэхэмрэ Адыгеим зыкIыщыдгъэ­псыхэрэр ыкIи зыкIыщыдгъэцэкIэжьхэрэр кIэлэцIыкIухэм гъэсэныгъэ дэгъу ягъэгъотыгъэным пае. Культурэмрэ спортым­рэкIэ учреждениехэр зыпкъ итэгъэуцожьых. Общественнэ чIыпIэхэр, щагу­хэр нахь зэтетэгъэпсыхьэх; цIыфхэмкIэ къуаджэхэмрэ къалэхэмрэ нахь гупсэфыпIэ хъунхэм пае гъогухэмрэ инженер коммуникациехэмрэ язытет нахьышIу тэшIы. Унагъом мэхьанэу иIэм зыкъегъэIэтыгъэнымкIэ, ныхэмрэ кIэлэцIыкIу­хэмрэ IэпыIэгъу ягъэгъотыгъэнымкIэ республикэм бэ щашIэрэр», — къы­Iуагъ АР-м и ЛIышъхьэ.

Джащ фэдэу КъумпIыл Мурат зэрэхигъэунэфыкIыгъэмкIэ, хэгъэгум ипащэхэр цIыфхэм IэпыIэгъу ягъэгъотыгъэ­нымкIэ амал тедзэхэм ренэу яусэх.

«Сабыир къызыхъукIэ зэтыгъо ахъщэ IэпыIэгъу е мазэ къэс ахъщэ IэпыIэгъу зэраратырэми, унэ къафыхэгъэкIыгъэнымкIэ, кIэлэцIыкIухэм яегъэджэнкIэ, ны-тыхэм IофшIэн къафэгъотыгъэнымкIэ IэпыIэгъу зэраратырэми ар афэгъэ­хьыгъ. Унагъо пэпчъ къэралыгъом иIэпыIэгъу зэхишIэным мэхьанэшхо иI. Ти Президентэу Владимир Путиным джарэущтэу тызекIонэу къытеIо. Федеральнэ гупчэм игъо ылъэгъурэ IэпыIэгъур зэрифэ­шъуашэу алъыдгъэIэсыным тыпылъ. Уна­гъохэм IэпыIэгъу тызэрафэхъущт шIыкIэм тэр-тэрэуи тылъэхъу. Мы илъэсым сабыибэ зэрыс унагъохэм сомэ миллиарди 2,5-рэ республикэм щаратыщт», —къыIуагъ республикэм и ЛIышъхьэ.

ЗэIукIэм хэлажьэхэрэр Iанэм кIэлъы­рысхэу зэдэгущыIагъэх. КъумпIыл Мурат якIэлэцIыкIухэм гъэхъагъэу, гухэлъэу яIэхэм къакIэупчIагъ.

Тынхэр къызфагъэшъошагъэхэм рес­публикэм ипащэ тхьауегъэпсэу раIуагъ унагъохэми, къоджэ псэупIэхэм яхэхъо­ныгъи анаIэ зэратыригъэтырэм фэшI. КIэлэцIыкIухэм зэIукIэм мэкъэмэ Iэмэ- псымэхэм къащырагъэIуагъ, усэхэм къыщяджагъэх.

Адыгеим и ЛIышъхьэ зэIукIэм икIэух Урысые зэнэкъокъум щатекIуагъэхэмрэ хэлэжьагъэхэмрэ къэгъагъэхэмрэ шIухьафтынхэмрэ аритыгъэх.

АР-м и ЛIышъхьэ ипресс-къулыкъу

Сурэтхэр А. Гусевым тырихыгъэх.