Къэлэ шъхьаIэм икъокIыпIэ лъэныкъо щыIэ урамхэу Ц. Теуцожьым ыцIэ зыхьырэмрэ Республиканскэмрэ зэтегъэпсыхьэгъэнхэмкIэ специалистхэм IофшIэнхэр лъагъэкIуатэх. Урам пэпчъ километрэ 1,4-рэ зикIыхьэгъэ гъогукIэ щашIынэу щыт.

Непэрэ мафэм ехъулIэу гъо­гухэр зэщыз ашIых, ахэм пшэ­хъо-мыжъо зэхэлъ атыратакъо. КъызэраIуагъэмкIэ IофшIэнхэр урамэу Республиканскэм щырагъэжьагъэх, нэужым Ц. Теуцожьым ыцIэ зыхьырэм зыфагъэзэщт. Гухэлъэу щыIэм диштэу нэмыкI пшъэрылъхэри зэшIуа­хыщтых.

Адыгэ Республикэм и ЛIышъхьэу КъумпIыл Мурат ипшъэ­рылъкIэ мы IофшIэнхэм апэ­Iухьащт сомэ миллион 60-м ехъур шъолъырым и Гъогу фонд къыхагъэкIыгъ. Мы илъэсым ыкIэм нэс IофшIэнхэр аухынхэу агъэнафэ.

— Республикэм ипащэхэм яIэпыIэгъукIэ Мыекъуапэ икъокIыпIэ лъэныкъо изэтегъэпсыхьан лъытэгъэкIуатэ. Ащ фытегъэпсыхьэгъэ инфраструктурэ тэгъэпсы, гъогукIэхэр тэшIых, электричествэм икIуапIэхэр псэуа­лъэхэм ятэщалIэх, нэмыкIэу зэшIотхырэр макIэп. Джащ фэдэу къэралыгъом щаштэгъэ социальнэ программэм ишIуагъэкIэ цIыфхэм ыпкIэ хэмылъэу гъэстыныпхъэ шхъуантIэр яунэхэм аращэлIэн амал яI, — къыIуагъ республикэм икъэлэ шъхьаIэ имэрэу Геннадий Митрофановым.

Шъугу къэдгъэкIыжьын, сабыибэ зэрыс унагъохэм къаратыгъэ чIыгу Iахьхэм инфраструктурэр ящэлIэгъэныр Адыгеим социальнэ-экономикэ хэхъоныгъэхэр ышIынхэм иунэе программэ къыдыхэлъытэгъэ пшъэ­рылъ шъхьаIэхэм ащыщ.

2022-рэ илъэсым Мыекъуапэ икъокIыпIэ лъэныкъо псыр ыкIи электричествэр IэкIэгъэхьэгъэн­хэм фэшI сомэ миллион 210-рэ къатIупщыгъ. Мы IофшIэнхэр тапэкIи лъагъэкIотэщтых.

(Тикорр.). Сурэтхэр Мыекъопэ къэлэ администрацием исайт къитхыгъэх.