Хэдзынхэр мэфищэ кIощтых
Адыгеим и Къэралыгъо Совет – Хасэм Тэхъутэмыкъое районымкIэ зы мандат зиIэ хэдзыпIэ коеу N 21-м идепутат ихэдзын тедзэхэр ыкIи муниципальнэ образованиехэм, къоджэ псэупIэхэм янароднэ депутатхэм ясоветхэм ахэтыщтхэм яхэдзынхэм язэхэщэн фытегъэпсыхьэгъэ кампание 43-рэ тыгъуасэ республикэм щырагъэжьагъ. Хэдзынхэр мэфищэ кIощтых, Iоныгъом и 11-м зэфэхьысыжьхэр ашIыщтых.
АР-м хэдзынхэмкIэ и Гупчэ комиссие къызэритыгъэмкIэ, Iоныгъом и 9-м пчэдыжьым сыхьатыр 8-м хэдзыпIэ чIыпIи 195-рэ зэкIэ муниципалитетхэм, къалэу Мыекъуапэ ахэмытэу, къащызэIуахыгъ. Мыгъэрэ хэдзынхэм кандидат 1519-рэ ахэлажьэ. Адыгеим пстэумкIи мандат 531-рэ щагъэнэфагъ.
ШIоигъоныгъэ зиIэ хэдзакIохэу тишъолъыр щыпсэухэрэм уахътэ къыхагъэкIынышъ, агукIэ нахь къапэблагъэу, зиIофшIакIэ нахьышIоу алъытэхэрэм амакъэ афатынэу Гупчэ комиссием зафегъазэ. Джащыгъум цIыфым къытефэрэр ышIагъэу ылъытэн ылъэкIыщт.
Джащ фэдэу анахьыжъэу тиIэхэм е ипсауныгъэкIэ хэдзыпIэхэм къякIолIэнхэу амал зимыIэхэм лъыплъакIохэр ядэжь къэкIонхэшъ, амакъэ атын алъэкIыщт.
Политическэ партиехэм, кандидатхэм ялъыплъакIохэм ыкIи зыми емыпхыгъэ лъыплъакIохэм яIофшIэн хэдзыпIэ чIыпIэ пстэуми ащызэхащагъ. Республикэм и Общественнэ палатэ ыцIэкIэ лъыплъэкIо тIурытIу участкэ пэпчъ ащыI, пстэумкIи нэбгырэ 400 мэхъух. Джащ фэдэу хэбзэухъумэкIо къулыкъухэм ялIыкIохэри мы кампанием къыхэлажьэх. ХэдзыпIэ чIыпIэхэр видео системэкIэ зэтегъэпсыхьагъэх.
Хэдзынхэр зыщыкIохэрэм ащыщ Шэуджэн районри. Мы кампаниер зэрэкIорэр къытфиIотагъ муниципалитетым ТИК итхьаматэу КIэнышхэ Руслъан.
— Хьакурынэхьаблэ, Джыракъые, Дукмасовэ, Заревэ, Мамхыгъэ ыкIи Хьатыгъужъыкъое къоджэ псэупIэхэм янароднэ депутатхэм ясоветхэм ялIыкIохэм яхэдзынхэр рагъэжьагъ. ПстэумкIи хэдзыпIэ чIыпIэ 17 къащызэIуахыгъ, ащ УИК-м хэт нэбгыри 112-мэ (амакъэ атынэу фитыныгъэ яI) Iоф ащашIэ. Хэдзынхэм ахэлэжьэнхэу кандидати 173-рэ атхыгъ, район советымкIэ аубытыщтыр мандат 15, къоджэ псэупIэхэмкIэ — 10. Непэрэ мафэм ехъулIэу Шэуджэн районым хэдзэкIо 11490-рэ щэпсэу, — хигъэунэфыкIыгъ ащ.
Джащ фэдэу КIэнышхэ Руслъан къызэриIуагъэмкIэ, хэдзынхэр рамыгъажьэхэзэ, ухьазырын Iофтхьабзэр зэрифэшъуашэу агъэцэкIагъ, лъэныкъо пстэуми щынэгъончъагъэр къадыхалъытагъ. Хэдзынхэм яапэрэ мафэ цIыфыбэ къакIоу хабзэп, арэущтэу щыт нахь мышIэми, уахътэ зиIэхэр къызэрекIуалIэхэрэр тигущыIэгъу къыхигъэщыгъ.
ХэдзакIохэм ащыщэу апэу щысэ къэзыгъэлъэгъуагъэхэм ащыщ муниципальнэ образованиеу «Шэуджэн район» зыфиIорэм ипащэу Аулъэ Рэщыдэ.
— Депутат корпусым кIэу хэхьащтхэм яIофшIэн зэрэзэхащэрэм бэ елъытыгъэр. Арышъ, цIыфхэм яIофыгъохэр зэшIозыхын зылъэкIыщт депутатхэм яхэдзын тишъыпкъапIэ етхьылIэн фае, — къыIуагъ районым ипащэ. Iэшъынэ Сусан.