Адыгэ Республикэм и Кощхьэблэ район щыпсэурэ хъулъфыгъэм кIэлэпIупкIэр игъом зэримытырэм къыхэкIэу уголовнэ Iоф къыфызэIуахыгъ. Хьыкумым унашъоу ышIыгъэмкIэ 1988-рэ илъэсым къэхъугъэ хъулъфыгъэм мазэ къэс исабый сом мини 8 ритын фэягъ. Ау ар IофшIапIэ Iухьаным дэгуIэщтыгъэп, ипшъэрылъхэр ыгъэцакIэхэ фэдэу зишIызэ, ахъщэу къыIэкIахьэрэм изы Iахь цIыкIу кIэлэцIыкIум фигъэхьыщтыгъ. Ащ фэдэ екIолIакIэм къыхэкIэу хъулъфыгъэм чIыфэу зэIуигъэ­кIагъэр сомэ мин 330-м кIэхьагъ. БлэкIыгъэ илъэсым шэкIогъум ащ административнэ пшъэдэкIыжь рагъэхьыгъагъ. Ау ащ къыгъэщынагъэп, кIэлэпIупкIэр игъом ытыгъэп. Хьыкумыр икIэрыкIэу мы Iофым хэплъэжьыгъ, хъулъфыгъэм ылъэныкъокIэ уголовнэ Iоф къызэIуихыгъ ыкIи ащ лажьэ иIэу ыгъэунэфыгъ. Мэзи 4-м къыкIоцI шIокI зимыIэ IофшIэнхэр ыгъэ­цэкIэнхэу унашъо ышIыгъ. Шъугу къэдгъэкIыжьын, илъэсэу тызыхэтым ищылэ мазэ мы лъэныкъомкIэ щыIэ хэбзэгъэуцугъэм зэхъокIыныгъэхэр фашIыгъэх ыкIи ащ кIуачIэ яIэ хъугъэ. Ащ къызэрагъэнафэрэмкIэ, кIэлэцIыкIухэм ыкIи Iоф зышIэн зымылъэкIыщт ны-тыхэм яIы­гъын пэIухьэрэ ахъщэм изы Iахь къэзытыхэрэми джы административнэ ыкIи уголовнэ пшъэдэкIыжь арагъэхьын алъэкIыщт. Ащ Iофыр нэшъумыгъэсэу шъуипшъэрылъхэр жъугъэцакIэх, пшъэдэкIыжьыр нахь зэрагъэлъэшыгъэр зыщышъумыгъэгъупш. Хьыкум приставхэм я Федеральнэ къулыкъу АдыгеимкIэ и ГъэIорышIапIэ ипресс-къулыкъу.