Адыгеим ичIыгулэжьхэм бжыхьэ мэфэ фабэхэр къызфагъэфедэхэзэ, гъэтхасэхэм яIухыжьын лъагъэкIуатэ.

АР-м мэкъу-мэщымкIэ и Министерствэ Iоныгъом и 9-м тызэрэщигъэгъозагъэмкIэ, ты­гъэ­гъэзэ гектар 63669-у халъхьэгъагъэм 14826-рэ хагъэ­кIыгъ, зым, гурытымкIэ лъытагъэу, центнер 21,1-рэ къеты. Мы уахътэм анахьыбэу, ар центнер 23,9-рэ, къизыхырэр Красногвардейскэ районым ичIыгулэжьхэр ары.

Чылапхъэ ашIынэу пстэумкIи натрыф гектар 18578-рэ гъатхэм халъхьэгъагъ. Кощхьэблэ, Красногвардейскэ ыкIи Шэуджэн районхэм яхъызмэтшIапIэхэр ащ иIухыжьын фежьагъэх. ГурытымкIэ лъытагъэу, центнер 66-рэ къырахы.

БылымIус ашIынэу пстэумкIи республикэм щыхалъхьэгъэгъэ натрыфым инахьыбэр Iуахыжьыгъах, тонн 14347-рэ къаугъоижьыгъ.

Сое гектар 11452-у мыгъэ тичIыгулэжьхэм апхъыгъагъэм щыщэу 1742-р ары Iуахыжьыгъэр, гурытымкIэ лъытагъэу, зы гектарым центнер 21,1-рэ къеты, тонн 3687-рэ къаугъои­жьыгъ. ХэтэрыкIхэр гектар 294-м ехъущтыгъэх. Ахэр зыгъэтIыс­хьэгъагъэхэм зэкIэми Iуахыжьы, тонн 937-рэ къырахыгъ.

Нашэ, хъырбыдз, къэбжъый зыфэпIощтхэр Джэджэ, Кощ­хьэблэ, Красногвардейскэ, Мыекъопэ ыкIи Шэуджэн районхэр ары зыщагъэтIысхьэгъагъэхэр. ЗэкIэмкIи гектар 511,7-рэ хъущтыгъ. Ахэм яIухыжьын фежьагъэхэр Джэджэ ыкIи Шэуджэн районхэм ячIыгулэжьхэр ары.

Гъэтхасэхэм яIухыжьын да­кIоу бжыхьэсэ лэжьыгъэхэр халъхьэх. Министерствэм къызэритыгъэмкIэ, гектар 109567-рэ мыгъэ ахэм арагъэубытынэу агъэнэфагъ. Ащ щыщэу 9982-м бжыхьэсэ хьэр халъхьащт, коцым пае агъэнэфагъэр гектар 88556-рэ мэхъу. Джащ фэдэу тритикале гектар 281-рэ, кIымэфэ чъыIэм «ымыгъэщтырэ» рап­­сэу гектар 10678-рэ апхъыщт.

ХъызмэтшIапIэхэр зэкIэ джыри бжыхьасэхэм япхъын фежьагъэ­хэп, мы уахътэм зэкIэмкIи халъхьагъэр гектар 6820-рэ мэхъу.

ХЪУТ Нэфсэт.