Iоныгъом и 1-м къыщыублагъэу экологиер къызщыхэгъэщыгъэ сурэт­хэм язэнэкъокъу республикэм щэкIо. Адыгеим къэралыгъо гъэпсыкIэ зиIэр илъэси 100 зэрэхъугъэм ар фэгъэхьыгъ, кIэщакIо фэхъугъэр ООО-у «ЭкоЦентр» зыфиIорэм и Адыгэ шъолъыр къутам.

Зэнэкъокъум хэлэжьэнхэу къырагъэблагъэх «ЭкоЦентрэм» къызэлъиубытырэ чIыпIэхэм ащыпсэурэ кIэлэцIыкIоу е зихэхъогъоу илъэси 3 — 16 зыныбжьхэр. Ахэм ясурэтхэр мы лъэныкъуи­щымкIэ аштэщтых:

1. «Отходы разделяй – природу Адыгеи сохраняй». Ар пыдзафэхэр зэхэдзыгъэу цIыфхэм къырахынхэм фэгъэхьыгъ.

2. «Вторая жизнь вещей». Пыдзафэхэм цIыфым ищыкIэгъэщт пкъыгъохэр ахэшIыкIыжьыгъэнхэр ары зыфэгъэхьыгъэр.

3. «Символы природы Адыгеи».

IофшIагъэхэр зытешIыхьагъэм, сурэтшIынымкIэ техникэу гъэфедагъэм мэхьанэ яIэп, шъхьадж зэрэфай. Амыштэщтхэр компьютерыр къыздырагъаIэзэ ашIыгъэхэр ары. ТекIоныгъэр къыдэзыхыхэрэм сертификатхэмрэ шIухьафтынхэмрэ къаратыщтых.

Джащ фэдэу зэнэкъокъум хэлажьэхэрэм яIофшIагъэхэр шъолъыр операторым икъэбарыкIэхэр зэрытхэм ыкIи исоциальнэ интернет нэкIубгъохэм къарыхьащтых. Анахь дэгъоу къыхахыхэрэр «ЭкоЦентрэм» нэпэеплъ шIухьафтынэу ыгъэхьазырхэрэр арытыщтых.

Сурэтхэр зэрыт файлэу цифрэ шIыкIэм тетэу гъэпсыгъэхэмрэ хэлэжьэщтхэм язаявкэхэмрэ (ар зэрэшIыгъэщтыр компанием иинтернет нэкIубгъо ит) Iоныгъом и 30-м нэс аштэщтых. IофшIагъэхэр электроннэ почтэмкIэ къагъахьыхэмэ хъущт. Адресыр: conkurs0I@clean-rf.ru. Офисэу мы ад­ресымкIэ щыIэм къырахьылIэми аIахыщтых: Мыекъуапэ, урамэу Пионерскэр, 297, ятIонэрэ этаж.

ООО-у «ЭкоЦентр» зыфиIорэм и Адыгэ шъолъыр къутамэ ипресс-къулыкъу.