Илъэс къэс Iоф зышIэрэ цIыфхэр мэфэкI мафэхэмрэ зыгъэпсэфыгъо уахътэмрэ дагъэсыхэу хабзэ.

Ахэм афэшъхьафэу Iофэу ашIэрэм ыкIи ащ тырагъэкIодэрэ уахътэм ялъытыгъэу зыгъэпсэфыгъо мафэхэм къафыхагъэхъонэу щыт.

IофшIэным и Кодекс къызэрэщиIо­рэмкIэ, ащ фэдэ IофшIэгъу мафэхэм атефэрэ лэжьапкIэр къаратыжьын фае. ГущыIэм пае, IофшIэгъу уахътэр текIыгъэми, цIыфыр сыхьат заулэрэ лэжьэн фаеу хъугъэмэ (сверхурочная работа), ащ тефэрэ ахъщэр е ащ ычIыпIэкIэ зы зыгъэпсэфыгъо мафэ къыратыжьынэу щыт.

Зыгъэпсэфыгъо мэфитIоу тхьамафэм къыхафэрэм яз е мэфэкI мафэм IофышIэ укъыдащыгъэмэ, мэфэ лэжьапкIэм тефэрэ ахъщэм фэдиз къыпфыхагъахъо. Уфаемэ, ахъщэм ычIыпIэкIэ зы мэфэ зыгъэпсэфыгъо къаIыпхыжьын уфит.

Диспансеризацие зышIыхэрэм ямэфэ лэжьапкIэ зэрашIомыкIодынэу, ащ тефэрэ ахъщэр хабзэм къаретыжьы.

Донорхэм лъы атын зыхъукIэ мэфитIо IофышIэ къыдэмыкIынхэ фитых. Апэрэ мафэм ауплъэкIух, ятIонэрэм лъыр ахащы. Ащ фэшъхьафэу зы мэфэ лые къараты.

Лъыр зыгъэпсэфыгъо мафэм тефэу донорым ытыгъэмэ, мэфитIо Iоф ымы­шIэу дагъэсыжьыщт.

Сэкъатныгъэ зиIэ сабыйхэм янэ-ятэхэмрэ ахэр зыпIунэу зыштагъэхэмрэ мазэм мэфиплIэ IофышIэ дэмы­кIынхэу фитыныгъэ яI. Ахэр зэкIэлъыкIохэу е зыщыфэехэ уахътэм аштэжьых, атефэрэ лэжьапкIэр IофшIапIэм къащаратыжьы.

А пстэум афэшъхьафэу Темыр Чы­жьэм Iоф щызышIэхэу зыныбжь илъэс 16 имыкъугъэ сабыйхэр зиIэхэмрэ къуа­джэхэм, къутырхэм ащылажьэ­хэ­рэмрэ мазэм зы мафэ загъэпсэфын фитых, ау ащ тефэрэ лэжьапкIэр къаратыщтэп.