Кавказ заповедникым изекIо лъагъохэм атетэу зызы­плъы­хьэ­хэрэм япчъагъэ къыщыкIэрэп, экскурсиехэр щы­нэгъончъэнхэм пае заповедникым иIофышIэхэм алъэкIыщтыр ашIэ.

ЦIыф мин пчъагъэу заповедникым идэхагъэ зэзыгъэлъэгъунэу къакIохэрэм мэкъэгъэIу ыкIи узгъэгъозэрэ тамыгъэ­хэр агъэфыкъохэу мэхъу, лъэсгъогухэр шIоих.

Къэралыгъо инспекторхэм бэмышIэу я 30-рэ зекIо маршрутыр агъэкъэбзагъ ыкIи агъэкIэжьыгъ. Къушъхьэ зэпырыкIыпIэу «Бабук-Аул» зыфиIорэм пэблагъэу мэкъу зыщаупкIэрэ гъэхъунэм ыгъунэ чэукIэ къагъэнэфагъ.

Къушъхьэ зандэм ыбгъукIэ узэрырекIокIырэ лъэмыджыр агъэкIэжьыгъ, пхъэмбгъоу телъыгъэхэр зэблахъугъэх.

Джащ фэдэу цIыфхэр нахьыбэрэ зэрыкIохэрэ лъагъохэм язытет зыфэдэм ренэу анаIэ тырагъэты.

Къушъхьэ зэпырыкIыпIэхэм шыхэм арагъэшхыщт мэкъум иупкIэн ащаухыгъ. Ар агъэгъушъыжьи, агъэтIылъы­жьыгъ. Джы кIымафэм агъэфедэщт гъэстыныпхъэм игъэхьазырын ыуж ихьагъэх.

Заповедникым икъулыкъушIэхэм яIофыгъохэр игъом зэшIуахых. Бжыхьэри, ащ къыкIэлъыкIощт кIымафэри къин амылъэгъоу зэрэрахыщтхэм яшъыпкъэу ыуж итых.