Къалэу Шъачэ зыщызгъэпсэфыхэрэм япчъагъэ къыщы­кIэрэп, чIыпIэ зэфэшъхьафхэм къарыкIыхэрэм ар агу рехьы.

Ащ енэкъокъун ылъэкIыщт хы курорт Дагъыстан щагъэпсымэ, хы фабэм фэшъхьафэу къушъхьэтх хьалэмэтхэр, ижъы­рэ къалэхэр, чIыопс саугъэт гъэшIэгъонхэр цIыф мин пчъагъэхэм зэрагъэлъэгъунхэ алъэкIыщт.

Дагъыстан ипащэхэм къэкIорэ илъэсым зыгъэпсэфыпIэм игъэпсын рагъэ­жьэнэу агу хэлъ. Ар республикэм и Каякентскэ район щагъэпсынэу къыхахыгъ.

Дагъыстан Республикэм и ЛIышъхьэу Сергей Меликовым къызэриIорэмкIэ, зыгъэпсэфыпIэм фэшъхьафэу Урысые кIэлэцIыкIу гупчи ашIынэу фаех.

— Каспийскэ хыIушъом къэлэ-курортыкIэ зэрэщыдгъэпсыщтым зыфэтэгъэ­хьазыры. Ар зыфэдэщтыр, псэуалъэхэу дэтыщтхэр, зыгъэпсэфыпIэ зэхэтым хэхьащтхэр къыхэтэхых. КIэлэцIыкIухэм атегъэпсыхьэгъэ лагерхэу «Артекым», «Орленкэм» афэдэхэр тищыкIагъэхэу тэлъытэ, — къыIуагъ ащ.

С. Меликовым къыхигъэщыгъ ­курортым бальнеологическэ, IэзэпIэ кластерхэр зэрэхэтыщтхэр. Ар анахь къэлэжъэу, къыблэ лъэныкъомкIэ щыIэ Дербент пэчыжьэщтэп. Къушъхьэхэр, тарихъым ыкIи чIыопсым ясаугъэтхэр, аэропортыр ыкIи федеральнэ гъогур пэблэгъэщтых.

Iоныгъом и 6-м Сергей Меликовым УФ-м и Президентэу Владимир Путиным зэIукIэгъу дыриIагъ. ЗыгъэпсэфыпIэ зэхэт инэу Дагъыстан щагъэпсыщтым фэгъэхьыгъэ Iофыгъохэм атегущыIагъэх.

— ЗекIо-рекреационнэ комплексхэр Темыр Кавказым нахьыбэу щыгъэпсыгъэнхэ фае, — къыIуагъ Президентым. — IэзапIэу Каякент советскэ лъэхъаным хэгъэгум анахь дэгъоу итыгъэхэм ащыщыгъ, цIыфыбэмэ япсауныгъэ зыпкъ щырагъэуцожьыщтыгъ. ЧIычIэгъым къы­кIэчъырэ псы Iэзэгъу фабэхэр къа­шъхьапэщтыгъ, къушъхьэ жьы къабзэ къыщащэщтыгъ.

Президентым къызэриIуагъэмкIэ, Iэ­кIыб хэгъэгухэм ащыIэ курортхэм янэ­къокъунхэ зылъэкIыщт зыгъэпсэфыпIэхэр Урысыем щыдгъэпсыщтых.