Дзэм кIощт ныбжьыкIэхэр къулыкъум фэгъэхьазырыгъэнхэм фэгъэхьы­гъэ зэIукIэгъухэр Мыекъуапэ щыкIуагъэх.

Адыгэ Республикэм и Правительствэ, и Парламент, Урысыем и ДОСААФ икъутамэу Адыгэ Республикэм щыIэм зэхащэгъэ Iофтхьабзэм илъэс 15 — 17 зыныбжь пшъашъэхэр, кIалэхэр хэлэжьагъэх. Адыгеим зэкIэ икъалэхэм, ирайонхэм якIэлэеджакIохэм яухьазырыныгъэ аушэтыгъ.

Зэнэкъокъум икъызэIухыгъо ныбжьыкIэхэм аIукIагъэх Адыгэ Республикэм и ДОСААФ итхьаматэу Т. Барцор, Урысыем ихьы­кум приставхэм якъулыкъу и ГъэIорышIапIэу Адыгеим щы­Iэм ипащэу А. Ихнор, нэмыкI­хэри.

УплъэкIунхэр

Купым хэтхэу еджакIохэр зэрэкIохэрэр, отрядым офицер­хэм сэлам арихыным зэрэфэхьазырыр, командирым иунашъо, кIэлэеджакIохэм зэдырагъаштэзэ япшъэрылъхэр зэрагъэца­кIэхэрэр ауплъэкIугъэх.

Красногвардейскэ районым иотрядэу «Патриотым» апэрэ чIыпIэр фагъэшъошагъ. Къалэу Мыекъуапэ ыкIи Мыекъопэ рай­оным яотрядхэу «Урысыем иныбжьыкIэхэр» ыкIи «Револь­вер» зыфиIохэрэм ятIонэрэ, ящэнэрэ чIыпIэхэр ахьыгъэх.

Псагъэм тырагъафэ

Автоматэу «Калашниковыр» анахь псынкIэу зэпкъы­рыхы­гъэным, Iа­шэм­кIэ псагъэм те­гъэфэгъэным, нэмыкIхэм яхьы­лIэгъэ зэнэкъокъу­хэр сыдигъуи гъэшIэ­гъоных.

Красногвар­дейскэ районым иотрядэу «Пат­риотыр» анахь Iэпэ­Iасэу зэхэщакIохэм алъытагъ. ­Мые­къопэ районыр ятIо­­нэрэ хъугъэ. Теуцожь районым иотрядэу «Бжъэдыгъум» ящэ­нэрэ чIыпIэр къыдихыгъ.

Шъхьэзэкъо зэнэкъокъухэу автоматэу Калашниковыр имыкъоу зэпкъырахыныр, аугъои­жьыныр кIэлэеджакIохэм ашIогъэшIэгъоныгъ.

Красногвардейскэ районым щыщэу Набэкъо Тимур апэрэ чIыпIэр фагъэшъошагъ. Адыгэ­къалэ къикIыгъэ Хьакъуй Абрек ятIонэрэ хъугъэ. Джэджэ районым иеджакIоу Дмитрий Пащенкэм ящэнэрэ чIыпIэр къыдихыгъ.

«Андырхъое ныбжьыкIэхэр»

Шэуджэн районым иотрядэу «Андырхъое ныбжьыкIэхэм» щэр псагъэм тегъэфэгъэнымкIэ апэрэ чIыпIэр къыдахыгъ. Тэхъу­тэмыкъое районым иотрядэу «НыбжьыкIэгъум» ятIо­нэрэ, Мые­къуапэ икIэлэеджа­кIохэр ящэнэрэ хъугъэх.

Шъхьэзэкъо зэнэкъокъухэм Мыекъуапэ щыщэу Владислав Субрис апэрэ чIыпIэр къащыдихыгъ. Джэджэ районым къи­кIыгъэ Виталий Шепиловыр ятIо­нэрэ хъугъэ, ящэнэрэ чIыпIэр Красногвардейскэ районым икIэлэеджакIоу Павел Воробьевымрэ Шэуджэн районым щапIугъэ Къуижъ Аскэррэ зэда­гощыгъ.

Пшъашъэхэм язэнэкъокъу Тэ­хъутэмыкъое районым щыщэу Ужъубанэкъо Бэлэ апэрэ чIыпIэр къыщихьыгъ. Мыекъопэ районым къикIыгъэ Виолетта Макаровам ятIонэрэ, Адыгэ­къалэ иеджакIоу ШъонтIыжъ Камилэ ящэнэрэ хъугъэх.

Медицинэм фэгъэхьыгъ

КIэлэеджакIохэм медицинэм яшIэныгъэ къыщагъэлъэгъуагъ. Кощхьэблэ районым иотрядэу «Вымпелыр», къалэу Мыекъуапэ иныбжьыкIэхэр, Мыекъопэ ыкIи Шэуджэн районхэр анахь дэгъухэм ащыщых.

Зэфэхьысыжьхэр

Зэнэкъокъум хагъэунэфы­кIырэ чIыпIэхэр къыщыдэзыхыгъэхэм щытхъу тхылъхэр, шIу­хьафтынхэр аратыжьыгъэх.

Урысыем и ДОСААФ икъутамэу Адыгэ Республикэм щы­Iэм иотдел ипащэу Ирина Ман­ченкэм изэфэхьысыжьхэм къа­щыхигъэщыгъ кIэлэегъаджэ­хэр, ДОСААФ-м икъулыкъу­шIэ­хэр зэхэщэн Iофыгъохэм чанэу зэрахэлажьэхэрэр. Дзэм къулыкъур щызыхьыщт кIалэхэм кIуачIэр апсыхьаным фэшI ама­лышIухэр яIэх. Адыгэ Рес-пуб­ли­кэм испорт псэуалъэхэм япчъагъэ хэхъуагъ, нахь зэтегъэпсыхьагъэ хъугъэх.

Дзэм кIощт кIалэхэм уащытхъунэу зэнэкъокъум зыкъыщагъэлъэгъуагъэми, щыкIагъэхэри яIэх. Iашэр нахьышIоу агъэфе­дэн фае. Псагъэм тегъэфэгъэным фэшI опыт зэрямыIэр зэ­IукIэгъухэм къащылъэгъуагъ.

Уахътэр псынкIэу лъэкIуатэ. КIэлэеджакIохэм шIэхэу гурыт еджапIэхэр къаухыщтых, дзэм къулыкъур щахьыщт. Атлетикэ псынкIэм, ат­летикэ онтэгъум, гим­настикэм, нэмыкI спорт лъэпкъхэм апылъ­хэу кIуачIэр, къулаир апсыхьанхэмкIэ амалышIухэр щы­Iэх. Тренер, кIэлэ­егъэ­джэ чъэпхъыгъэхэр Адыгэ Республикэм щэ­псэух. Ныб­жьыкIэ­хэм щысэ зытырахыни, IэпыIэгъу къафэ­хъуни яI.

Къэралыгъо гъэпсыкIэ иIэу Адыгеир зы­псэурэр илъэси 100 зэрэхъугъэм фэгъэ­хьы­гъэ зэ­нэ­къокъухэр, пIуныгъэм ехьы­лIэгъэ зэхахьэхэр рес­публикэм и ДОСААФ зэхищэщтых. Барцо Тимур къызэрэтиIуагъэу, лIы­хъужъ ыкIи лэжьэкIо щытхъум япхыгъэ чIыпIэхэр ныбжьыкIэ­хэм арагъэлъэгъущтых, ветеранхэм, дзэм икъулыкъушIэхэм аIуагъэкIэщтых.

ЛIэужхэр зэзыпхырэ зэха­хьэхэр, ныбжьыкIэхэм ягушъхьэ кIуачIэ къэзыIэтырэ зэIукIэгъу гъэшIэгъонхэр кIэлэеджакIохэм ящыкIагъэх. Джырэ уахътэ шIэныгъэу, IэпэIэсэныгъэу зэра­гъэ­гъотырэр дзэ къулыкъум ща­гъэ­федэщтых. Хэгъэгум игъунапкъэхэр, мамыр щыIакIэр ныбжьыкIэхэм цыхьэшIэгъоу къау­хъумэщтых.

ЕмтIылъ Нурбый.