ГъэрекIо, мэкъуогъум и 1-м, кIэлэцIыкIухэм якъэухъумэн и Дунэе мафэ тефэу Адыгэ Республикэм и ЛIышъхьэу КъумпIыл Мурат чIыпIэ къин ифэгъэ унагъохэм якIэлэцIыкIухэр ыкIи Iэтахъохэр зыщаIыгъырэ республикэ социальнэ шъхьэегъэзыпIэу «Онджэкъ» зыфиIоу Каменномостскэм дэтым зэкIом ыгъэгугъагъэх кIэлэцIыкIу спорт площадкэр афигъэуцунэу ыкIи учреждением ыубытырэ чIыпIэр къаригъэшIыхьанэу.

КъумпIыл Мурат иунашъокIэ мэзитIум къыкIоцI шъхьэегъэзыпIэм спорт площадкэ зэтегъэпсыхьагъэ щагъэуцугъ ыкIи учреждениер ихъурэягъэкIэ чэу дахэкIэ къашIыхьагъ. Мы псэуалъэм ишIуагъэкIэ шъхьэегъэзыпIэм охътэ гъэнэфагъэкIэ щаIыгъ кIэлэцIыкIухэм зыщагъэпсэфын ыкIи яуахътэ чэфэу щагъэкIон алъэ­кIыщт. Ащ нэмыкIэу кIэлэцIыкIухэм ыкIи Iэтахъохэм яфизическэ ыкIи психическэ псауныгъэ щагъэпытэн амал яIэщт, джащ фэдэу псауныгъэм зэрар езыхырэ шIыкIэхэр щыгъэзыегъэнхэм фэIорышIэщт. Сыд фэдэрэ уахъти площадкэр кIэлэцIыкIу творчествэм икъызэIухыпIэу щытыщт, яуахътэ шIуагъэ къытэу агъэ­кIонымкIэ ар амалышIу хъущт.

Адыгэ Республикэм IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч джэгупIэ площадкэр зыфашIыгъэ кIэлэцIыкIухэм адэжь тыгъуасэ щыIагъ ыкIи мэфэкI шIыкIэм тетэу ар къызэIуихыгъ.

— Социальнэ учреждением ынаIэ къытыридзи, иIэпыIэгъу къызэрэтигъэкIыгъэм фэшI Адыгеим и ЛIышъхьэу КъумпIыл Мурат лъэшэу тыфэраз. Мыщ ыпэкIэ мы учреждением дэтыгъэ джэгупIэр шапхъэхэм адиштэщтыгъэп. Джы щыIэныгъэм кIэу къыхэхьагъэхэм адиштэу спорт-джэгупIэ площадкэ зэтегъэпсыхьагъэр къыдэуцуагъ. Сицыхьэ телъ кIэлэцIыкIухэм яуахътэ чэфэу зэрагъэкIощтым ыкIи япсауныгъэ апсыхьан зэралъэкIыщтым. Площадкэр лъэныкъо пчъагъэм фытегъэпсы­хьагъ, анахьыжъхэм апае тренажерхэр, баскетбол ешIапIэр, анахь цIыкIухэм апае джэгупIэ унэр, къечъэхыпIэр, хъэренэр, нэмыкIхэри хэтых. Джащ фэдэу учреждениер къызэрэшIыхьэгъэгъэ чэури зэблэтхъугъ. Площадкэм игъэпсыни, чэум ишIыни зэхэтэу республикэ бюджетым иахъщэу сомэ миллиони 6-рэ мин 500-рэ пэIухьагъ. ПсэолъэшI IофшIэнхэр зыгъэцэкIагъэхэм лъэшэу тагъэрэзагъ, дэгъоу ыкIи игъом IофшIэнхэр зэшIохыгъэ хъугъэ — къыIуагъ Дж. Мырзэм.

Джащ фэдэу министрэм къызэрэхигъэщыгъэмкIэ, тапэкIи учреждением изэтегъэпсыхьан Iоф дашIэщт. ЧIыпIэ къин ифэгъэ унагъохэм якIэлэцIыкIу нэбгырэ 30-м шъхьэегъэзыпIэр афытегъэпсыхьагъ. Ахэм япчъагъэ ренэу зэ­хъо­кIы, мази, мэзитIуи кIэлэцIыкIухэр мыщ щаIыгъых. Ау уахътэу зэрэщаIы­гъыр илъэсныкъом ехъу хъущтэп. А уахътэм къыкIоцI кIэлэцIыкIур шъхьэегъэзыпIэм зычIамыщыжькIэ, ны-тыхэм яфитыныгъэ­хэр аIахынхэ фаеу мэхъу. Мыщ фэдэ кIэлэцIыкIухэм якъэухъумэн ыкIи яIыгъын къэралыгъом ынаIэ лъэшэу тырегъэты ыкIи амалышIухэр къаретых. КIАРЭ Фатим.