Лъэпкъ проектэу «ПсэупIэр ыкIи къэлэ щыIакIэр» зыфиIорэм къыдыхэлъытэгъэ Iофтхьабзэхэм ягъэцэкIэн пае аштэгъэ федеральнэ проектэу «Чистая вода» зыфиIорэм хэхьэрэ IофшIэнхэр Теуцожь районым щылъагъэкIуатэх.

АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, къуаджэу Джэджэхьаблэ псыкъычIэщыпIэу щырагъэжьа­гъэр гъунэм рафылIагъ. Ащ ипроект къыдыхэлъытагъэу, скважинитIу аубырыугъ, башнеу псым кIуачIэ езытыщтыри, оборудованиеу зыгъэкъэбзэщтыри агъэуцугъэх, чIыпIэр къашIыхьагъ, джы зэрагъэфэжьы. Подрядчикым IофшIэнхэр Iоныгъом и 20-м шIомыкIэу ыухынхэшъ, псэуалъэр ытынэу ары зэригъэнэфагъэр. Ащ ишIын сомэ миллион 16,2-рэ пэIухьагъ.

Джащ фэдэу мы район дэдэм ит къутырэу Городскоим щыпсэухэрэм псы къабзэр икъоу аIэкIэзыгъэхьэщт псэуалъэ щашIы. Мыщ къычIэщыпIищ щаубырыугъ, башнери, обрудованиеу псыр зыгъэкъэбзэщтыри агъэуцугъах, чIыпIэу къызэлъиубытырэр зэрагъэфэжьы. ПстэумкIи ащ сомэ миллион 14 пэIуагъэхьагъ.

Мы псэуалъэр аухыхэу затIупщыхэкIэ, псы къабзэм ылъэныкъокIэ Джэджэхьаблэрэ Городскоимрэ гумэкIыгъо зыпари зэрямыIэжьыщтыр министерствэм къыщыхагъэщыгъ.