«УишIэныгъэкIэ адэгуащ» («Поделись своим знанием») зыфиIорэ Iофтхьабзэу Мыекъопэ къэралыгъо технологическэ университетым щыкIуагъэм кIэщакIо фэхъугъэх УФ-м гъэсэныгъэмкIэ и Министерствэрэ Урысые обществэу «ШIэныгъэмрэ». Тихэгъэгу исубъектхэм зэкIэми ар Iоныгъом и 1-м къыщыублагъэу ащэкIо.

2021-рэ илъэсыр ары апэрэу мыщ фэдэ Iофтхьабзэ зызэхащагъэр. Ащ къыдыхэлъытагъэу къэралыгъо ыкIи общественнэ IофышIэшхоу, шIэныгъэлэжьэу, бизнесменэу, культурэм ыкIи искусствэм ялIыкIохэу, спорт­сменэу, нэмыкIэу зыфэгъэзэгъэ лъэныкъом гъэхъагъэ щызышIыгъэхэр зихэхъогъухэм, ныбжьыкIэхэм аIокIэх, яшIэныгъэхэмкIэ, опытэу яIэмкIэ адэгуащэх.

— Мы Iофтхьабзэр зэхэщэгъэныр хэбзэшIу хъунэу ежьагъ, — къыIуагъ Урысые обществэу «ШIэныгъэм» и Адыгэ респуб­ликэ организацие ипащэу, тарихъ шIэныгъэхэмкIэ докторэу Ацумыжъ Казбек. — ЦIыф еджагъэу, гъэсагъэу, IофшIагъэ­хэр мымакIэу зиIэхэр шIэны­гъэу зэрагъэгъотыгъэмкIэ ныбжьыкIэхэм адэгуащэх. КъыткIэхъу­хьэрэ лIэужхэм чIыпIэу щыIэныгъэм щаубытыщтым икъы­хэхынкIэ ар IэпыIэгъушхо хъущт. Дунаим техъухьэхэрэм афэгъэ­хьыгъэ къэбархэр шъыпкъэм тетэу алъыгъэIэсыгъэныри пшъэрылъ шъхьаIэу мы Iоф­тхьабзэм иIэхэм ащыщ.

БлэкIыгъэ илъэсым гурыт еджапIэхэр ары анахьэу мы Iофтхьабзэр зыщыкIуагъэр, мыгъэ студентхэм афызэхащэ. Ащ тетэу Мыекъопэ къэралыгъо технологическэ университетым щеджэхэрэм аIукIагъэх АР-м экономикэ хэхъоныгъэхэмкIэ иминистрэу Шэуджэн Заур, гу­манитар шIэныгъэхэмкIэ Адыгэ республикэ институтэу Т. КIэращэм ыцIэ зыхьырэм жэрыIо народнэ творчествэмкIэ иотдел инаучнэ IофышIэ шъхьаIэу Къуе­къо Асфар, этнологиемкIэ ыкIи лъэпкъ искусствэмкIэ отделым инаучнэ IофышIэ шъхьаIэу, искусствоведением ылъэныкъокIэ шIэныгъэхэмкIэ кандидатэу Къу­екъо Мариет.

Спикерхэр зыфэгъэзэгъэ лъэ­ныкъохэмкIэ шIэныгъэу яIэмкIэ студентхэм адэгощагъэх. Экономикэм, бизнесым, къэралыгъо гъэIорышIэным ямызакъоу, адыгэ хабзэу ижъыкIэ щыIагъэ­хэм, непэ къытхэнэжьыгъэхэм, ахэм мэхьанэу яIэм къатегущыIагъэх, студентхэм яупчIэхэм джэуапхэр аратыжьыгъэх. ХЪУТ Нэфсэт.