ДАХ-м изэIукI, мэфэкIхэр
Дунэе Адыгэ Хасэм (ДАХ-м) и Хэсашъхьэ изичэзыу зэIукIэ Iоныгъом и 9-м Налщык щыкIощт.
Республикэ общественнэ движениеу «Адыгэ Хасэм» итхьаматэу ЛIымыщэкъо Рэмэзан къызэрэтиIуагъэу, Хэсашъхьэм изэхахьэ лъэпкъ Iофыгъоу къыщаIэтыщтмэ ащыщ адыгэу Iэ-кIыб къэралхэм ащыпсэухэрэм ятарихъ чIыгу къагъэзэжьыным фэшI хэбзэ шапхъэхэм адиштэу Къэбэртэе-Бэлъкъарым Iоф— хэр зэрэщылъыкIуатэхэрэр.
Тилъэпкъэгъухэр, анахьэу Тыркуем ис ныбжьыкIэхэр, Урысыем иапшъэрэ еджапIэхэм зэращеджэхэрэм, тарихъ чIыгум щеджэ зышIоигъохэм якъыхэхын, кIэлэцIыкIухэм языгъэпсэфыгъо мафэхэр гъэшIэгъонэу зэхэщэгъэным, нэмыкIхэм атегущыIэщтых. Хэсашъхьэм аужырэ мазэхэм Iофэу ышIагъэр зэфахьысыжьыщт.
ДАХ-м хэтхэу ЛIымыщэкъо Рэмэзан, ЦiыкIушъо Аслъан, ГъукIэлI Сусан, Хьаблаукъо Адам, Хъот Юныс, Дунэе Адыгэ Хасэм ипрезидент иупчIэжьэгъоу МэщфэшIу Нэдждэт Адыгеим икIыгъэ купым хэтхэу Хэсашъхьэм изэIукIэ хэлажьэх.
Къэбэртэе-Бэлъкъарыр къэралыгъо гъэпсыкIэ иIэу зыпсэурэр илъэси 100 зэрэхъурэр Iоныгъом и 10-м игъэкIотыгъэу республикэм щыхагъэунэфыкIыщт. Адыгэм и Мафи ащ дакIоу агъэмэфэкIыщт.
МэфэкI зэхахьэхэм Адыгеим щыщхэр арагъэблэгъагъэх.
Къош республикэм зэхахьэхэр зэрэщыкIуагъэхэм тигъэзетеджэхэр щыдгъэгъозэщтых.