МэфэкIым зыфагъэхьазыры
Адыгэ Республикэм дзюдомкIэ, самбэмкIэ, тхэквондомкIэ, нэмыкI бэнакIэхэмкIэ щытхъур къыфэзыхьыхэрэм тарэгушхо.
Мыекъуапэ и Мафэ фэгъэхьыгъэ зэхахьэхэм Адыгэ Республикэм испортсменхэр чанэу хэлэжьагъэх. Мыекъуапэ испорт еджапIэу Владимир Максимовым ыцIэ зыхьырэм итренер шъхьаIэу Яна Цеханович ыгъэсэрэ кIэлэцIыкIухэм гимнастикэм яIэпэIэсэныгъэ къыщагъэлъэгъуагъ.
Мыекъуапэ иурам шъхьаIэу Краснооктябрьскэм къыщызэIуахыгъэ чIыпIэ хэхыгъэхэм дзюдомкIэ ныбжьыкIэхэр ащыбэнагъэх.
Урысыем тхэквондомкIэ ихэшыпыкIыгъэ командэхэм ахэтых Владислав Власовыр, Ристэ Аминэ. Адыгэ Республикэм испорт еджапIэу N 2-м ныбжьыкIэхэм зыщагъасэ. Тренерэу Олег Тыщенкэр япащэу тхэквондом щыщ едзыгъохэр кIалэхэм, пшъашъэхэм къашIыгъэх.
— Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм тигъэхъагъэхэр пэтэгъохых, — къытиIуагъ Адыгэ Республикэм испорт еджапIэу N 2-м ипащэу, Урысыем, Адыгеим язаслуженнэ тренерэу, Дунэе Адыгэ Хасэм зекIонымкIэ, ныбжьыкIэ IофхэмкIэ, физкультурэмкIэ ыкIи спортымкIэ и Комитет итхьаматэу Хъот Юныс. — СпортымкIэ дунэе класс зиIэ мастерэу Даур Къадырбэч, ушу-саньдамкIэ Урысыем и Кубок гъогогъуи 9 къыдэзыхыгъэ Кристина Морозовам, спортышхом егъэжьэпIэшIухэр щызышIыгъэхэ Ристэ Аминэ, Владислав Власовым, нэмыкIхэм Адыгеим имэфэкI зыфагъэхьазыры.