Къэралыгъо гъэпсыкIэ иIэу Адыгеир зыпсэурэр илъэси 100 зэрэхъугъэм фэгъэхьыгъэ Iофтхьабзэхэм къахиубытэу Адыгэ Республикэм и Лъэпкъ тхылъеджапIэ зэIукIэгъу щызэхащагъ.

Урысые Федерацием, Адыгэ Республикэм культурэмкIэ яминистерствэхэр, АР-м и Лъэпкъ тхылъеджапIэ Iофтхьабзэм кIэщакIо фэхъугъэх. Къыблэм, Темыр Кавказым ямуниципальнэ тхылъеджапIэхэм яфондхэр непэрэ щыIакIэм диштэу гъэпсы­гъэнхэм епхыгъэ егъэджэнхэм ар афэгъэхьыгъагъ.

ТхылъеджапIэхэм яIофхэр лъы­гъэкIотэгъэнхэм фэшI 2030-рэ илъэсым нэс къэралыгъо екIо­лIакIэ фашIызэ фондхэм ахэгъэ­хъогъэным пылъыщтых. Къыблэм ыкIи Темыр Кавказым ямуниципальнэ тхылъеджапIэхэм ящыкIэгъэ кадрэхэм яшIэныгъэхэм ахагъэхъоным пае нэбгырэ 80 рагъэджэщт. Адыгеим щыщхэр нэбгырэ 38-рэ мэхъух.

Адыгэ Республикэм и Лъэпкъ тхылъеджапIэ ипащэу, Адыгеим культурэмкIэ изаслуженнэ Iофы­шIэу Къыкъ Бэлэ кадрэхэм яшIэныгъэ хагъэхъонымкIэ егъэ­джэ­ным шIуагъэ къызэритыщтыр къы­Iуагъ. Урысыем и Лъэпкъ тхылъеджапIэ пэшIорыгъэшъэу кадрэхэм яегъэджэн ехьылIэгъэ Iофхэр щагъэцэкIагъэх. Тхылъеджа­пIэхэм яфондхэм яIофшIэн щыIэныгъэм диштэу зэхащэным фэшI фондхэм ящыкIэгъэ до­кументхэр кIэу атхыгъэх. ЦIыф­хэм яфэIо-фашIэхэр гъэцэкIэ­гъэнхэм ахэр фэIорышIэщтых.

Урысыем и Лъэпкъ тхылъ­еджапIэ ишIэныгъэ-методическэ отдел ипащэу, Урысыем итхылъеджапIэхэм яассоциацие и Гъэ­IорышIапIэ хэтэу Ирина Эйдемиллер хэгъэгум итхылъеджапIэхэм яфонд гъэпсыгъэным дэлажьэ.

Ащ къызэриIуагъэмкIэ, тхылъеджапIэхэм яфондхэм зэхъокIыныгъэхэр афэшIыгъэнхэм Iоф дэзышIэрэ кадрэхэм яшIэныгъэ­хэм ахамыгъахъо хъущтэп.

Кадрэхэм ягъэхьазырын очнэ шIыкIэм тетэу Адыгэ Республикэм и Лъэпкъ тхылъеджапIэ Iоныгъом и 23-м нэс щыкIощт. Модельнэ тхылъеджапIэхэм яамалхэр агъэ­федэхэзэ, муниципальнэ тхылъеджапIэхэм яфондхэм зэхъокIыныгъэхэр афашIыщтых.