Къэралыгъо гъэпсыкIэ иIэу Адыгеир зыпсэурэр илъэси 100 зэрэ­хъу­гъэм фэгъэхьыгъэ зэнэкъокъухэр республикэм икъэлэ шъхьаIэ щэкIох.

КIэлэцIыкIухэм ягулъытэ зыкъегъэIэтыгъэным, джэгукIэхэм ахэлажьэхэзэ яшIэныгъэ хагъэ­хъоным яхьылIэгъэ Iофтхьа­бзэхэм нэбгырабэ ахэлажьэ.

Ны-тыхэр, зэхэщэкIо купым хэтхэр кIэлэцIыкIухэм IэпыIэгъу къафэхъугъэх. Курэжъыехэр, къухьэм фэдэ теплъэ зиIэхэр, нэмыкIхэри ашIыгъэх. «СТОлетний Мыекъуапэ» зыфиIорэ къэ­гъэлъэгъоным яIэшIагъэхэр къы­рахьылIагъэх. Урысыем, Адыгеим якъэралыгъо быракъхэр зэхахьэм щагъэбыбэтагъэх. Мыекъуапэ иадминистрацие кIэ­щакIо зыфэхъугъэ зэнэкъо­къур дахэу рекIокIыгъ.

Маушъэхэм, Мэрэтыкъохэм, Багъырэкъохэм, Долговхэм, Эль­даровхэм, Сафроновхэм, Шевченкэхэм, Титаренкэхэм, нэмыкIхэм яунэгъо экипажхэм хагъэунэфыкIырэ чIыпIэхэр афа­гъэшъошагъэх.

Шытхьалэ (Белореченск) къи­кIыгъэхэ Кураевхэм апэрэ чIы­пIэр къыдахыгъ.

Мыекъуапэ иэстраднэ-орэдыIо зыгъэсапIэу «Радугэм» иеджакIохэр зэнэкъокъум къыщыхагъэщыгъэх. Мамсырхэм яунэгъо экипаж шIухьафтын шъхьаIэр къыдихыгъ. Сомэ мини 7 — 10 зыосэ шIухьафтынхэр зыхьыгъэхэм аратыжьыгъэх.

«Радугэм» ихудожественнэ пащэу Елена Щербак, Мам­сырхэм яунагъо къэгъэлъэгъоныр лъэшэу агу зэрэрихьыгъэр къытаIуагъ.

— Зэнэкъокъухэм, зэхэхьэ гъэшIэгъонхэм яшIуагъэкIэ кIэлэцIыкIухэм хэпшIыкIэу яшIэныгъэ хагъахъо, — къытиIуагъ Мыекъуапэ иадминистрацие культурэмкIэ и ГъэIорышIапIэ ипащэу Цэй Розэ. —– Искусствэм зэрэпыщагъэхэм дакIоу, пхъэм, гъучIым, фэшъхьафхэм джэгуалъэхэр ахашIыкIыгъэх. Адыгеим имэфэкI зэнэкъокъур зэрэфэгъэхьыгъэм къыпкъырыкIыхэзэ, адыгэ шъуашэр экипажхэм ащыгъыгъ. Республикэм ибыракъ дахэу агъэбыбэтагъ.

— Неущрэ мафэм фэдгъэсэрэ кIэлэцIыкIухэм непэ тагъэгу­шIуагъ, — къыщиIуагъ зэха­хьэм Мыекъуапэ иадминист­рацие ипащэ иапэрэ гуадзэ иIэнатIэ зыгъэцэкIэрэ Сергей Стельмах. — Лъэхъаным ди­штэу кIэлэцIыкIухэм ахэтлъхьэрэ пIуныгъэ амалхэр шIукIэ къятэжьыщтых. Ны-тыхэм, зэкIэ кIэлэцIыкIухэм тафэраз. Мые­къуапэ, Адыгэ Республикэм ядэ­хагъэ ахагъахъо.

Мыекъуапэ ипчэгу шъхьаIэу В. И. Лениным ыцIэ зыхьырэм щыкIэгъэ зэхахьэр кIэлэцIыкIу­хэм бэрэ агу къэкIыжьыщт. ШIухьафтын лъапIэу къафагъэшъошагъэхэр нэпэеплъ гукъэ­кIыжьэу яIэщтых.

ЕмтIылъ Нурбый. Сурэтхэр зэхахьэм къыщытетхыгъэх.