«Пушкинскэ картэм» игъэфедэн
Культурэм фэгъэхьыгъэ Iофтхьабзэхэм яплъырэ цIыфхэм япчъагъэ нахьыбэ шIыгъэныр сыда зэлъытыгъэр?
Адыгэ Республикэм культурэмкIэ и Министерствэрэ Адыгеим шъолъыр гъэIорышIэнымкIэ и Гупчэрэ зэхащэгъэ зэIукIэгъур республикэм и Къэралыгъо филармоние щыкIуагъ. Сэнаущыгъэ зыхэлъ ныбжьыкIэхэм яшIэныгъэ щыIэныгъэм нахьышIоу щагъэфедэным фэшI илъэс 14 — 22-рэ зыныбжьхэм «Пушкинскэ картэм» шIуагъэу къытырэм тегущыIагъэх.
Зэхахьэр культурэмкIэ министрэу Аулъэ Юрэ, министрэм иапэрэ гуадзэу Ольга Гавшинам, Адыгеим шъолъыр гъэIорышIэнымкIэ и Гупчэ ипащэу Къоджэшъэо Казбек зэращагъ.
Онлайн шIыкIэм тетэу культурэм фэгъэхьыгъэ Iофыгъохэм ахэлэжьэрэ ныбжьыкIэхэм, IофшIапIэхэм ясоциальнэ нэкIубгъохэм алъыплъэхэрэм япчъагъэ хэхъо. «Пушкинскэ картэм» ипрограммэ хэпшIыкIэу лъэкIуатэ.
Илъэс 14 — 22-рэ зыныбжьхэу Адыгэ Республикэм щыпсэухэрэр мин 44-м нахьыбэ мэхъух. А пчъагъэм щыщхэу нэбгырэ мин 14-м фэдизмэ «Пушкинскэ картэр» агъэфедэ.
ЗэкIэ ныбжьыкIэхэр «Пушкинскэ картэм» ипрограммэ хэхьанхэ фаеу зэхахьэм унашъо щаштагъ. Аулъэ Юрэ, Ольга Гавшинам, культурэм иIофышIэхэу зэIукIэгъум хэлэжьагъэхэм къаIуагъ рагъэжьэгъэ Iофтхьабзэр зэрэлъагъэкIотэщтыр. Культурэм иучреждениехэр ащ чанэу хэлэжьэщтых.
Тарихъыр, культурэр, шэн-хабзэхэр ныбжьыкIэхэм нахьышIоу зэрагъэшIэнхэм фэшI щыIэныгъэм изэхъокIыныгъэхэм нахь куоу защагъэгъозэн фае. КIэлэегъаджэхэр, культурэм щылажьэхэрэр ныбжьыкIэхэм IэпыIэгъу зэрафэхъущтхэм елъытыгъэр макIэп.