Урысые зэнэкъокъоу «Унэ, щагу анахь дэгъу» зыфиIорэм ишъолъыр чэзыу щатекIуагъэхэм щытхъу тхылъхэр аратыжьыгъэх.

Партиеу «Единэ Россиемрэ» АР-м псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ и Министерствэрэ 2022-рэ илъэсым бэдзэогъум и 1-м къыщегъэжьагъэу зэнэкъокъум хэлажьэ зы­шIоигъохэм язаявкэхэр аублэгъагъ. Фаехэм сайтэу moydom.er.ru зыфиIорэм шышъхьэIум и 15-м нэс заявкэр щаIэкIагъэхьан алъэкIыщтыгъэ.

Партийнэ проектэу «МКД-м щыпсэухэрэр» зыфиIорэм Адыгэ РеспубликэмкIэ икоординаторэу Владлена Кононовамрэ АР-м псэолъэшIынымкIэ и Ми­нистерствэ ЖКХ-мкIэ игъэIорышIапIэ ипащэу Ныбэ Руслъан­рэ зэнэкъокъум щатекIуагъэхэм шIухьафтынхэр аратыжьыгъэх.

Лъэныкъоу «Анахь зэгурыIорэ унагъу» зыфиIорэм ятIонэрэ чIыпIэр къыщызыхьыгъэхэр урамэу Пионерскэм тет унэу N 389-м (я 2-рэ корпус) чIэсхэр ары. Ахэм дипломрэ ахъщэ шIухьафтынрэ афагъэшъошагъэх. Чкаловым иурам тет унэу N 86/3-м щыпсэухэрэм апэрэ чIыпIэр къахьыгъ.

«Жюрим фэтэрыбэу зэхэт тиунэ ятIонэрэ чIыпIэр къызэрэфигъэшъошагъэм фэшI лъэшэу тыфэраз. Зэнэкъокъум тыхэлажьэ зэхъум приз къэтхьынэу тыгугъэгъахэп. Шъып­къэмкIэ, унэгъо зэгурыIожьэу тызэдэпсэу, апэрэ чIыпIэр тапэкIэ къы­зэрэтхьыщтым ыуж титыщт. ЧIыпIэхэм язэтегъэпсыхьан фэгъэхьыгъэ Iофтхьабзэ горэ, гъунэ­гъухэм я Дунэе мафэ зэхатщэхэ зыхъукIэ зэгъунэгъу­хэм чанэу ахэм тахэлажьэ. Ахэм тэ нахь зэпэблагъэ ташIы», — къы­Iуагъ лъэныкъоу «Нахь зэгурыIожьрэ унагъу» зыфиIорэм щатекIуагъэу Рамиса Татомир.

Лъэныкъоу «ТСЖ/ЖСК-мкIэ зиIофшIэн нахь чанэу зэхэзыщэ­хэрэр» зыфиIорэм ятIонэрэ чIыпIэр къыщызыхьыгъэхэр Чка­ловым иурам тет унэу N 86/3-м щыпсэухэрэр ары. Дипломрэ ахъщэ шIухьафтынрэ ахэм афа­гъэшъошагъэх. А 1-рэ чIыпIэр къэзыхьыгъэр урамэу Пролетарскэм тет унэу N 302-м щып­сэухэрэр ары.

Лъэныкъоу «Щагу нахь зэтегъэпсыхьагъ» зыфиIорэмкIэ а 1-рэ чIыпIэр зыфагъэшъоша­гъэр урамэу Железнодорожнэм тет унэу N 158-м ищагу ары. Лъэныкъоу «Подъезд анахь хъупхъ» зыфиIорэм а 1-рэ чIыпIэр аубы­тыгъ урамэу Пионерскэм тет унэу N 389-м (я 2-рэ корпус) щыпсэухэрэм.

«Лъэныкъоу «Подъезд анахь хъупхъ» зыфиIорэм сызэрэщытекIуагъэмкIэ насыпышIоу зысэлъы­тэжьы. Типодъезд чIэс- хэм хьакIэхэр агъэлъапIэх, зэгурэIожьых. ТиихьапIэ зэрэкъэбзэщтым, рэхьатыпIэу зэрэщытыщтым ренэу тыпылъ. Жюрим ащ гу къызэрэлъитагъэр ыкIи уасэ къызэрэфишIыгъэр лъэшэу си­гуап», — къы­Iуагъ лъэныкъоу «Подъезд анахь хъупхъ» зыфиIорэм щате­кIогъэ Ирина Селивановам.

Лъэныкъоу «Унэм игъэцэ­кIэжьынкIэ нахьыбэу опыт зи­Iэр» зыфиIорэмкIэ а 1-рэ чIыпIэр къэзыхьыгъэр урамэу Ком­мунаровым тет унэу N 151-м чIэсхэр ары. ТОС-у N 4-м итхьаматэу Ирина Мухинам къы­зэриIуагъэмкIэ, зигугъу къэтшIыгъэ унэм щыпсэухэрэр ягуапэу зэнэкъокъум хэлэжьагъэх.

«Лъэныкъоу «Унэм игъэцэкIэжьынкIэ нахьыбэу опыт зиIэр» зыфиIорэм тиунэ а 1-рэ чIыпIэр къыщихьыгъ. Мыщ фэдэ зэнэкъокъум тихэгъэгу щыпсэухэрэм амал арегъэгъоты опытэу яIэмкIэ зэдэгощэнхэу. Илъэс къэс мыщ фэдэ зэнэкъокъур зэхащэ, ащ цIыфхэр нахьыбэу хэлажьэхэ сшIоигъу», — къыIуагъ Ирина Мухинам.

Шъугу къэтэгъэкIыжьы чIыпIэ зыгъэIорышIэжьынымкIэ къулыкъухэри, фэтэрыбэу зэхэт унэ­хэм яIофхэм ягъэзекIон пылъхэ­ри мы Iофтхьабзэм зэрэхэлэжьагъэхэр. Урысые зэнэкъокъур унэ, щагу, микрорайон нахь зэтегъэпсыхьагъэм икъыхэгъэщын фэIорышIэ.

Мы охътэ благъэм зэнэкъо­къум ифедеральнэ чэзыу щатекIо­­хэрэр къэнэфэщтых. Iоныгъом и 11-м Москва псэолъэшIынымкIэ и Министерствэ ахэм наградэхэр къащыфагъэшъошэщтых. УФ-м псэолъэшIынымкIэ и Министерствэ, псэупIэхэм хэхъоныгъэ ягъэшIыгъэнымкIэ Фондыр, ЖКХ-м ылъэныкъокIэ общественнэ уплъэкIунхэр зэхэзыщэрэ Лъэпкъ гупчэу «ЖКХ Контроль» зыфиIорэр ары зэнэкъокъур зэхэзыщэхэрэр.