Адыгэ Республикэм июбилей фэгъэхьыгъэу Мыекъуапэ щыпсэурэ бзылъфыгъитIум километрэ 40 къакIугъ ыкIи маршрутэу «Адыгея 100» зыфиIорэр зэхагъэуцуагъ.

Пчэдыжьым сыхьатыр 5:17-м рагъажьи, километрэ 40 сыхьати 7-рэ такъикъ 58-кIэ къакIугъ. Такъикъ 15-рэ бэ­дзэршIыпIэм дэжь зыщагъэпсэфыгъ. Адыгеим соми 130-кIэ щэджэгъуашхэ щыпшIын зэрэплъэкIыщтыри къагурыIуагъ. Щэлэмэ стыррэ адыгэ къуаерэ ашхыгъ.

БзылъфыгъитIур Адыгеим къыщымыхъугъэхэми, илъэс пчъагъэ хъугъэу щэпсэух. Елена Зезюкинар Самарэ къикIыгъэу Мыекъуапэ илъэс 13 хъугъэу дэс, Оксанэ Киракосян Грузием щыщ, илъэс 28-рэ хъугъэу Адыгеим щэпсэу.

Еленэрэ Оксанэрэ спортым пыщагъэх, къэлэ ыкIи рес­публикэ зэнэкъокъухэм ахэлажьэх, къушъхьэм зекIо макIох.

Къэралыгъом, республикэм хэхъоныгъэхэр ашIынхэм пае нэбгырэ пэпчъ ежь ышъхьэ къыщыригъэжьэн, ишIэныгъэхэм ахигъэхъон, спортыр шIу ылъэгъун фаеу зэра­лъытэрэр къаIуагъ. Джащ фэдэу АР-м и ЛIышъхьэу КъумпIыл Мурат зэрэфэразэхэр, мы аужырэ илъэсхэм къалэр зэхапшIэу зэрэзэхъокIыгъэр, хэхъоныгъэхэр зэришIыгъэхэр къыхагъэщыгъ.