Гъэстыныпхъэ шхъуантIэр унэм ипщэныр IэшIэхэп. Аужырэ лъэхъаным зигъот макIэхэм къызэрахэхъуагъэм ар джыри нахь хьылъэ къышIыгъ.

Ар къыдилъыти, Къэралыгъо Думэм ыштэгъэ хэбзэгъэуцугъэр бэмэ агу рихьыгъ, ыпкIэ амытэу газкъэкIуапIэхэр ахэм яунэхэм къазэраращэлIэщтхэм ар фэгъэ­хьыгъ.

Хэта гъэстыныпхъэ шхъуан­тIэр къызэращэлIэщтхэм аха­хьэхэрэр? Ахэр программэр зыгъэнэфагъэхэм къыхахыгъахэу щыт. Ар зипсэупIэ къагъэсыщтхэр газрыкIуапIэхэр зыщызэбгыращыгъэхэ къуаджэхэм, къутыр­хэм, нэмыкI псэупIэхэм адэсынхэ фаеу щыт. Программэм къызэрэдилъытэрэмкIэ, 2030-рэ илъэсым нэс зиунэ гъэстыныпхъэ шхъуантIэр ищагъэхэм япчъагъэ проценти 10-м ехъоу къахэхъонэу типащэхэр мэгугъэх. ЗэкIэмкIи, къэралы­гъор IэпыIэгъу зыфэхъущтхэр унэгъо миллионищ фэдиз мэхъу. Ар макIэп, ау ахэм газ зимы­Iэхэр зэкIэ ахэлъытагъэ хъурэп.

Программэм ухэфэным ыпэу зэбгъэшIэн фае узщыпсэурэ псэупIэр гъэстыныпхъэ шхъуан­тIэр къызфащэщтхэм ахэфагъэ­мэ. Газыр къыпашIэным ищыкIэгъэ оборудованиер пэшIорыгъэшъэу зэбгъэгъотымэ на­хьышIу. Ар бгъэфедэнэу узэрэфаер зэрытхэгъэ лъэIу тхылъыр программэм иоператор, газовэ компанием иофис е МФЦ-м аIэкIэбгъэхьащт.

Гъэстыныпхъэ шхъуантIэр псэупIэм къыпфыращэлIэным пае узэрежэщт уахътэр зыфэдизыр чIыпIэ администрацием иплан-график хэтхагъэу исайт итыщт. ГазрыкIуапIэр унагъом ичIыгу Iахь пэблагъэмэ, мазэм къыкIоцI ар псэупIэм къыращэлIэщт, метрэ 30-кIэ пэIудзыгъэ­мэ, мэфи 100-м къыкIоцI Iоф­шIэнхэр къаухыщтых, нахьыбэмэ, илъэсырэ уежэнэуи хъун ылъэ­кIыщт. (Тикорр.).