Шъуикадастрэ номер зыфэдэр шъошIа?
Амыгъэкощырэ мылъку мин 570-м ехъумэ яхьылIэгъэ къэбархэр амыгъэкощырэ мылъкумкIэ къэралыгъо реестрэ зыкIым (ЕГРН) итых. Ахэм кадастрэ номер унае яI. Амыгъэкощырэ мылъкоу щымыIэжьми икадастрэ номер нэмыкI горэм фагъэшъуашэ хъущтэп.
Мы илъэсым ибэдзэогъу ехъулIэу чIыгу Iахь мин 254-рэ фэдиз, унэ мини 172-м ехъу, бгъэгъэ мини 122-м ехъу учетым хэтыгъ. Джащ фэдэу псэолъэ мин 11-мэ, псэолъэныкъошI мини 5,5-мэ, автомобиль гъэуцупIэ 650-рэ фэдизмэ, амыгъэкощырэ комплекси 4-мэ афэгъэхьыгъэ къэбархэр ЕГРН-м итых.
«Кадастрэ номерым зы мылъкур адрэм хигъэкIуакIэрэп, псэуалъэр зыфэдэм, ащкIэ фитыныгъэу яIэхэм ыкIи нэмыкIхэм яхьылIэгъэ къэбархэри ащкIэ къызIэкIагъэхьан алъэкIыщт», — къыIуагъ Адыгэ Республикэм и Кадастрэ палатэ ипащэу ХъокIо Аюбэ.
Азыфагу точкитIу дэтэу кадастрэ номерыр пчъэгъэ заулэу зэхэт. Сыда а пчъагъэхэм къаушыхьатырэр? Тштэн, гущыIэм пае, кадастрэ номерэу 01:04:0502004:18-р. 01-м къыгъэнафэрэр кадастрэ шъолъырыр зэрэ Адыгэ Республикэр ары, 04-м къыгъэнафэрэр мылъкур Мыекъопэ кадастрэ районым зэрэщыIэр ары, 0502004-р – кадастрэ районым къыхиубытэрэ кадастрэ кварталым иномер, 18-р – амыгъэкощырэ мылъкум иномер.
Документхэм кадастрэ номерыр ащымыгъэнэфагъэмэ, Росреестрэм иэлектрон фэIо-фашIэхэу «Публичная кадастровая карта», «Справочная информация по объектам недвижимости в режиме оnIinе» зыфиIохэрэр къызыфэжъугъэфедэн шъулъэкIыщт.
Кадастрэ номерыр зэзыгъашIэ зышIоигъохэм МФЦ-м зыфагъазэмэ, амыгъэкощырэ мылъкумкIэ къэралыгъо реестрэ зыкIым къэбархэр къафыхатхыкIыщтых. Джащ фэдэу Росреестрэм исайткIэ электрон фэIо-фашIэхэр ахэм къафагъэцэкIэщтых е Кадастрэ палатэм иIофышIэ ядэжь къэкIонышъ, ящыкIэгъэ фэIо-фашIэр къафигъэцэкIэщт.
«Сыд фэдэрэ амыгъэкощырэ мылъкуи ЕГРН-м хагъэхьан фае. Кадастрэ номер зиIэ мылъкум ищэн-щэфын хабзэм диштэу зэшIохыгъэ хъущт. Амыгъэкощырэ мылъкур учетым хэмыт зыхъукIэ, ищыкIэгъэ документхэр аугъоинхэ, кадастрэ учетым мылъкур хагъэуцоным, ямылъку унае ар зэрэхахьэрэр къызыщыгъэшъыпкъэжьыгъэ документыр къаратыным зыщыкIэлъэIухэрэ тхылъыр аIэкIагъэхьан фае», — къыIуагъ Росреестрэм ишъолъыр гъэIорышIапIэ ипащэу Марина Никифоровам.