Джыри зы шIушIэ куп
«Единэ Россием» и НыбжьыкIэ Гвардиерэ» «Волонтерхэм я Ротэрэ» ахэтхэм джыри отряд кIэу зэхащи, Донбасс кIуагъэх. Ахэр Мариуполь, Волновахи, Купянскэ, Изюм ыкIи Волчанскэ адэсхэм IэпыIэгъу афэхъущтых.
«Единэ Россием» и НыбжьыкIэ Гвардие» ипащэ игуадзэу Иван Дзюбан къызэриIуагъэмкIэ, отрядым нэбгырэ 65-рэ хэт.
— Пшъэрылъэу яIэр бэ, — къыIуагъ Иван Дзюбан. — ГущыIэм пае, Мариуполь исымэджэщ чIэт врачхэм адеIэщтых, шIушIэ IэпыIэгъур агощыщт, «Единэ Россием» игупчэу IэпыIэгъу зытыхэрэм Iоф ащашIэщт. Волонтерхэм ащыщхэр пIалъэм нахьыбэрэ къэтынхэу, ишIуагъэ арагъэкIынэу фаех. Гъэтхапэм и 30-м къыщегъэжьагъэу къэтхэр ахэтых. ЯпшIыкIуенэрэ отрядэу кIуагъэм нахьыпэкIэ ащ щыIагъэу нэбгырэ заулэ ягъус.
Адыгеим и «НыбжьыкIэ Гвардие» ипащэу, «Единэ Россием» и Генеральнэ Совет хэтэу, Мыекъуапэ идепутатхэм ащыщэу Бэрзэдж Асыет къызэриIуагъэмкIэ, Донбасс ыкIи ащ къыпэIулъ чIыпIэу шъхьафит ашIыжьыгъэхэм Iоф зэращашIэщтым зыщыфагъэсэхэрэ Гупчэр жъоныгъокIэ мазэм къызэIуахыгъ.
— Мы уахътэм ахэм ялIыкIохэр шIушIэ IэпыIэгъум фэгъэзэгъэ Гупчэу Мариуполь, Мелитополь, Купянскэ, Изюм ыкIи Волчанскэ къащызэIуахыгъэхэм Iоф ащашIэ, — къыхигъэщыгъ ащ.