Гъэтхасэхэр Iуахыжьых, бжыхьасэхэр апхъых
АР-м мэкъу-мэщымкIэ и Министерствэ Iоныгъом и 6-м тызэрэщигъэгъозагъэмкIэ, Адыгеим ичIыгулэжьхэм мы мафэхэм гъэтхэсэ лэжьыгъэр Iуахыжьы.
Тыгъэгъазэу мыгъэ халъхьагъэр зэкIэмкIи гектар 63669-рэ хъущтыгъ. БлэкIыгъэ илъэсым 53531-рэ рапхъыгъагъэр. Гектар 8983-рэ хагъэкIыгъ, зым, гурытымкIэ лъытагъэу, центнер 21,4-рэ къеты.
Чылапхъэ ашIынэу натрыф гектар 18578-рэ яIагъ. Кощхьэблэ ыкIи Шэуджэн районхэм яхъызмэтшIапIэхэм ащыщхэр ащ иIухыжьыни фежьагъэх. ГурытымкIэ центнер 66-рэ къырахы. БылымIус ашIынэу халъхьэгъэ натрыфым инахьыбэр Iуахыжьыгъах, тонн 14047-рэ къаугъоижьыгъ.
Сое гектар 7084-рэ мыгъэ республикэм щапхъыгъагъ. Джэджэ, Кощхьэблэ ыкIи Теуцожь районхэм ячIыгулэжьхэм ар Iуахыжьы, гурытымкIэ лъытагъэу, зы гектарым центнер 22,4-рэ къеты. ХэтэрыкIхэр гектар 294-м ехъущтыгъэх. Ахэр зыгъэтIысхьэгъагъэхэм зэкIэми Iуахыжьы, тонн 492,7-рэ къырахыгъ.
Нашэ, хъырбыдз, къэбжъый зыфэпIощтхэр Джэджэ, Кощхьэблэ, Красногвардейскэ, Мыекъопэ ыкIи Шэуджэн районхэр ары зыщагъэтIысхьэгъагъэхэр. ЗэкIэмкIи гектар 511,7-рэ хъущтыгъ. Ахэм яIухыжьын фежьагъэхэр Шэуджэн районым ичIыгулэжьхэр ары ныIэп.
Гъэтхасэхэм яIухыжьын дакIоу бжыхьэсэ лэжьыгъэм ихэлъхьани Адыгеим щырагъэжьагъ. Министерствэм къызэритыгъэмкIэ, гектар 109567-рэ мыгъэ ахэм арагъэубытын гухэлъ яI. Джэджэ районым ибжыхьасэхэр анахьыбэ мэхъух, яхэлъхьанкIи апэ ит. Гектар 32967-рэ зэкIэмкIи ащ ичIыгулэжьхэм агъэнэфагъ. Ащ щыщэу 2830-р хьэм пай, 2706-р апхъыгъах. Коцым пае агъэнэфагъэр гектар 23844-рэ мэхъу. Ащ щыщэу 22456-р халъхьэгъах.
Тритикалем гектар 61-рэ рагъэубытынэу агъэнэфэгъагъ, ау ащ къырагъэхъугъ, 68-рэ апхъыгъ. КIымэфэ чъыIэм «ымыгъэщтэрэ» рапсэу гектар 4646-рэ халъхьагъ, агъэнэфагъэр 6232-рэ. Бжыхьасэхэм япхъын фежьагъэх Кощхьэблэ, Тэхъутэмыкъое, Теуцожь ыкIи Шэуджэн районхэм ячIыгулэжьхэри.
ХЪУТ Нэфсэт.