«ТекIоныгъэм идиктант» мыгъэ яплIэнэрэу Адыгеим щыкIуагъ. Пло­щадкэ 39-у къызэIуахыгъагъэхэм нэбгырэ 2500-м ехъу къякIолIэгъагъ.

Такъикъ 45-м къыкIоцI Хэ­гъэгу зэошхом фэгъэхьыгъэ упчIэ 25-мэ джэуапхэр къа­ратыжьынхэ фаеу щытыгъ. ЧIы­пIэ шъхьаIэу диктантыр зы­щыкIуагъэр Адыгэ Республикэм и Лъэпкъ музей ары.

Джащ фэдэу онлайн шIыкIэм тетэу ухэлэжьэн плъэкIынэуи щытыгъ. Ащ пае интернет нэкIубгъоу «диктантпобеды.рф» зыфиIорэр зэIухыгъагъ.

Зэфэхьысыжьхэр чъэпыогъу мазэр ары зашIыщтхэр. Анахь дэгъоу упчIэхэм джэуапхэр къязытыжьыгъэхэм ТекIоныгъэм и Парадэу Москва и Краснэ Площадь щыкIощтым хэлэжьэнхэу билетхэр къаратыщтых.

Шъугу къэдгъэкIыжьын, мы Iофтхьабзэм партиеу «Единэ Россиер», тарихъымкIэ Урысые обществэр, дзэ-тарихъ обществэр изэхэщакIох, къэралыгъо ыкIи общественнэ организациехэр, къулыкъу зэфэшъхьаф­хэр къадеIэх. ГущыIэм пае, диктантым изэхэщэнкIэ IэпыIэгъу хъугъэхэм ащыщых Рособр­надзорыр, Россотрудничествэр, УФ-м гъэсэныгъэмкIэ и Министерствэ, «ТекIоныгъэм иволонтерхэр» зыфиIорэ движениер, Урысыем иветеранхэм я Союз, УФ-м зыкъэухъу­мэжьынымкIэ ыкIи хэгъэгу кIоцI IофхэмкIэ иминистерст­вэхэр, Росгвардиер, МЧС-р, нэмыкIхэр.

Илъэс къэс Iофтхьабзэм IэпыIэгъу къыфэхъу президентскэ грантхэм я Фонд.