Ахъщэ тын зэфэшъхьафэу УФ-м Пенсиехэм­кIэ ифонд ыгъэпсыхэрэм ащыщхэм мы илъэ­сым зэхъокIыныгъэхэр афэхъугъэх.

ГущыIэм пае, ны мылъкум фэгъэхьыгъэ программэм къызэрэщыдэлъытагъэу, апэрэ сабыир къызэрыхъухьэгъэ унагъом ахъщэ тынэу къыратырэр сомэ 525527-рэ чапыч 90-рэ хъугъэ. Зы сабый зэрыс уна­гъом ятIонэрэр 2020-рэ илъэсым ыпэкIэ къыфэхъугъэмэ е ыпIунэу къаIихыгъэмэ, ащ къыратырэм сомэ 53712-рэ чапыч 27-рэ къыхэхъуагъ ыкIи сомэ 693144-рэ чапычи 10-м нэсыгъ. Апэрэм пае ны мылъкур къызэратыгъа­хэу, нэужым сабый къызфэ­хъугъэхэм е ыпIунэу къаIызыхыгъэхэм къэралыгъом IэпыIэгъоу къаритырэр сомэ 168616-рэ чапыч 20-рэ.

Джащ фэдэу фэгъэкIотэнхэр зиIэхэм мазэ къэс къа­фэкIорэ ахъщэ тыныр проценти 8,4-кIэ индексацие ашIыгъ. Ахэр зыфагъэнафэхэрэр сэ­къатныгъэ зиIэхэр (кIэлэцIыкIоу сэкъатныгъэ зиIэхэри ахэтых), техногеннэ хъугъэ-шIагъэхэм зэрар къызфахьыгъэхэр, Хэ­гъэгу зэошхом, нэмыкI зэо-зэпэуцужьхэм ахэлэжьагъэхэр, яветеранхэр, нэмыкIхэр.

Социальнэ фэIо-фашIэхэм «япакет» ыуаси къыхэхъуагъ. Мэзаем и 1-м къыщегъэжьагъэу ар сомэ 1313-рэ чапыч 44-рэ мэхъу.

УФ-м ПенсиехэмкIэ ифонд ыгъэпсырэ социальнэ IэпыIэгъоу проценти 8,4-кIэ индексацие ашIыгъэхэм ащыщых кIэлэцIыкIум ыныбжь илъэсрэ мэзи­хырэ мэхъуфэкIэ ащ лъыплъэ­рэм мазэ къэс къыфэкIорэ ахъ­щэ IэпыIэгъур, сабыир къызыхъукIэ зэтыгъоу къатырэр, ра­диацием иягъэ зэригъэкIыгъэ­хэм къафэкIорэ ахъщэ тыныр.

ГущыIэм пае, бзылъфыгъэу сабый ежэрэм е къызфэхъу­гъэм пособиеу къыратырэр сомэ 767-рэ чапыч 72-рэ хъугъэ, сабыир къызыхъукIэ къатырэр — сомэ 20472-м къехъугъ.

Сабыим лъыплъэнэу зыштэгъэ унагъохэм, сэкъатныгъэ зиIэ кIэлэцIыкIур, зыныбжь илъэси 7-м шIокIыгъэр е зы ным къы­лъфыгъэхэр ыпIунхэу зышта­гъэхэм зэтыгъо ахъщэ тынэу къафакIорэр сомэ 156428-рэ чапыч 66-рэ хъугъэ.

Дзэм къулыкъу щихьынэу ащагъэм ишъхьэгъусэ сабый ежэмэ, ащ зэтыгъо ахъщэ тын къыфэкIо. Мыгъэ ар сомэ 32420-рэ чапыч 77-рэ зэрэ­хъугъэр.

КIэлэцIыкIоу къэхъугъэм ыныбжь илъэсрэ мэзихырэм нэсыфэкIэ сомэ 7677-рэ чапыч 81-рэ унагъом къыфэкIо, дзэм къулыкъу щихьынэу ащагъэм сабый къызэрэфэхъугъэм пае зэтыгъоу сомэ 13894-рэ чапыч 61-рэ къыраты.

Дунаим ехыжьыгъэр агъэтIылъыжьыным пае къатырэ пособиер 2022-рэ илъэсым сомэ 6964-рэ чапыч 68-рэ зэ­рэхъугъэр.