Урысые Федерацием футбо­лымкIэ иапшъэрэ куп щызэнэ-къокъухэрэ клубхэм Iоныгъом и 3 — 5-м я 8-рэ зэIукIэгъухэр яIагъэх.

ЕшIэгъухэр

«Оренбург» — «Химки» — 3:1, «Пари НН» — «Факел» — 3:1, «Краснодар» — «Шъачэ» — 2:1, «Динамо» — «Урал» — 2:1, «Крылья Советов» — ЦСКА — 0:1, «Локомотив» — «Ахмат» — 0:1, «Спартак» — «Зенит» — 1:2, «Торпедо» — «Ростов» — 0:1.

Яплъыгъэ пчъагъэр

«Краснодар» — «Шъачэ» — нэбгырэ 27097-рэ яплъыгъ. «Спартак» — «Зенит» — яплъыгъэр 14950-рэ, «Динамо» — «Урал» — 14101-рэ, «Крылья Советов» — ЦСКА — 83557-рэ, «Локомотив» — «Ахмат» — 7862-рэ, «Пари-НН» — «Фа- кел» — 3950-рэ, «Оренбург» — «Химки» — 4936-рэ.

«Спартак» ешIэгъур дэгъоу ригъэжьагъ. Александр Соболевым ухъумакIохэр ыгъэплъэхъухи, «Зенит» икъэлапчъэ дахэу Iэгуаор дидзагъ — 1:0. «Зенит» Москва ще­шIагъэми, иIэпэIэсэныгъэ нахьышIоу къы­гъэлъэгъуагъ. Д. Ловрен я 48-рэ, А. Мостовоим я 60-рэ такъикъхэм «Спартак» икъэлапчъэ Iэгуаор дадзагъ.

«Спартак» пчъагъэм зэхъокIыныгъэ фишIынэу уахътэ иIагъ, ау зэгурыIоныгъэ хэлъэу ыпэкIэ щешIагъэп. Арэущтэу «Спартак» зэнэкъокъум тапэкIи хэлэжьэщтмэ, дышъэм фэбэнэн ымылъэкIыщтэу футболым иосэшIхэм къаIуагъ.

«Краснодар» «Шъачэ» зыIокIэм, текIоныгъэр къыхьыным фэбэнагъ. Олусегун я 49-рэ такъикъым хъагъэм Iэгуаор ридзагъ. «Краснодар» футболымкIэ и Академие щапIугъэ Эдуард Сперцян зэIукIэгъу пэпчъ ешIэкIэ дахэ къыщегъэлъагъо. «Шъачэ» икъэлэпчъэIут чыжьащэу ыпэкIэ къызэрэ­лъыкIотагъэр Э. Сперцян зелъэгъум, Iэгуаор къэлэпчъэIутым шъхьапыридзи, хъагъэм щи­гъэчэрэгъугъ.

Мелкадзе «Краснодар» икъэлапчъэ Iэ­гуаор зыдедзэм, ешIэгъур нахь гъэшIэгъон хъугъэ. «Шъачэ» нахьыбэрэ ыпэкIэ илъэу фежьагъ шъхьае, пчъагъэр 2:1-у къэнагъ.

ЗэхъокIыныгъэхэр

«Химки» итренер шъхьаIэу Iоф зышIэ­щтыгъэ С. Юран иIэнатIэ зыIуагъэкIыгъэм къыщегъэжьагъэу командэм ешIэгъуи 4 иIагъ, зэкIэри шIуахьыгъ. «Урал» В. Гончаренкэр итренер шъхьаIэу агъэнэфагъ. «Торпедэм» ипащи зэблахъугъ. «Факел» очко пчъагъэу иIэм хигъахъорэп, арэу щытми, тренер шъхьаIэр зэблахъуным Iэшъхьэтетхэр дэгуIэхэрэп.

ЦСКА-м, «Динамэм» яешIакIэ хагъахъо. «Зенит», «Динамэм». «Ростов» мыгъэ ешIэгъухэр зыкIи ашIуахьыгъэхэп. «Факел», «Тор­педэм», «Урал» текIоныгъэр зыкIи къы­дахыгъэп.

Пенальтищ

«Торпедэр» «Ростов» зыIокIэм, судьям гъогогъуи 9 «Торпедэм» иешIакIохэм тамыгъэ гъожьыр къаригъэлъэгъугъ. Зэнэкъокъум иаужырэ такъикъ зыщаухыщтым пенальтир судьям ыгъэунэфыгъ. «Торпедэм» икъэлэпчъэ­Iутэу Бабуриныр линием къызэпырыкIызэ гъогогъуи 2 Iэгуаор къызэкIидзэжьыгъ. Я 90+9 такъикъым «Ростов» иешIакIоу Осипенкэм пенальтир ящэнэрэу ыгъэцакIи, хъагъэм Iэгуаор ридзагъ, «Ростов» текIоныгъэр 1:0-у къыдихыгъ.

ЧIыпIэхэр

1. «Зенит» — 20 2. ЦСКА — 17 3. «Краснодар» — 17 4. «Динамо» — 16 5. «Спартак» — 16 6. «Ростов» -16 7. «Шъачэ» — 13 8. «Ахмат» — 11 9. «Локомотив» — 9 10. «Кр. Советов» — 9 11. «Пари НН» — 9 12. «Оренбург» — 9 13. «Химки» — 7 14. «Факел» — 4 15. «Торпедо» — 1 16. «Урал» — 1.